Controis entre Trazo e Ames, en cuxa praia fluvial se prohibe o baño ata que se confirmen os indicios de que non hai contaminación
10 jul 2018 . Actualizado ás 13:48 h.As augas do Tambre presentan uns niveis normais, segundo as mostras recollidas polo Concello de Ames na praia fluvial de Tapia, pero manterá a recomendación de evitar o baño ata que cheguen ao Concello os resultados das analíticas que encargou á empresa Espiña e Delfín e os dos servizos de Sanidade da Xunta. Estas análises máis detalladas inclúen parámetros que non se coñecen nas probas instantáneas que se realizan in situ na praia fluvial, explicou o concelleiro de Medio Ambiente de Ames, Blas García. As analíticas detalladas foron solicitadas con carácter de urxencia para poder levantar as restricións canto antes, sempre que as augas non estean contaminadas. O goberno local amiense agarda ter os resultados definitivos hoxe ou mañá.
A alerta saltou ao detectarse a presenza de peixes mortos e moribundos con feridas tanto en Tapia como noutros puntos do río, en Ponche Alvar (Trazo). Algo similar ocorrera fai quince días, e motivou a denuncia pública dos veciños da zona de Ponche Alvar. Estes sinalaron que se realizaron inspeccións con resultado negativo.
O alcalde de Ames, José Miñones, indicou que os resultados das análises non detalladas da fin de semana daban un PH da auga moi baixo, e tamén os niveis de osíxeno eran menores do normal. Con só estes datos poderíase xustificar a mortaldade de peixes, de acordo co rexedor. Aínda así, ante estes resultados, optouse por previr prohibindo o baño e pedir análises máis completas. Na recollida de mostras de onte, o PH estaba xa dentro de parámetros normais, pero aínda era baixo; e o osíxeno tamén tiña resultados aceptables. Miñones explicou que todo apunta a que o problema podería non ser consecuencia dunha vertedura, senón doutro fenómeno que adoita ocorrer cando se producen alzas bruscas da temperatura ou debido á choiva aceda, que se produce coas altas temperaturas.
Tamén os responsables técnicos do Concello de Santiago realizaron análise da auga do Tambre nas praias fluviais de Chaián e no Refuxio, e os resultados tampouco guindan contaminación, polo que non se prohibirá o uso da zona de baño. Así mesmo realizáronse comprobacións na planta potabilizadora do Tambre, con igual resultado. Onde se mantén a preocupación é en Ponche Alvar (Trazo). Segundo pescadores que frecuentan esa zona, volvéronse atopar troitas e escalos mortos. Ante esta situación, alertaron a Protección Civil por temor a que se trate de verteduras incontroladas ao río de Tambre.
Pola súa banda, a plataforma veciñal contra o vertedoiro de Miramontes, en Santiago, reclamou «unha investigación rápida e eficaz» e asegurou que o 22 de xuño apareceron en Ponche Alvar «gran cantidade de peixes mortos» e o río «presentaba unha tonaliade moi escura, con escuma e desprendía mal cheiro».
Algúns veciños optaron por zambullirse en Tapia ante a falta de bandeira vermella pola mañá
A bandeira vermella que advertía do perigo e da prohibición do baño na praia de Tapia non estaba colocada onte pola mañá no recinto. Esta circunstancia, e o feito de que tampouco houbese carteis informativos recomendando non bañarse no río, fixo que algúns veciños que acudiron a primeiras horas da mañá désense un mergullo no Tambre.
Un grupo de veciños, entre os que había varios nenos, queixáronse do feito de que faltase información e apuntaron que un operario do Concello avisoulles do problema cando viron aos nenos bañarse. A outra parella, cun bebé, tamén lles indicaron que tirasen a auga da pequena piscina de plástico que habían preparado para o pequeno, e aseguraron que tampouco sabían que a praia tiña problemas. Moi preto deles, un home facía oídos xordos ás recomendacións e dábase un longo mergullo no río.
Segundo informou o concelleiro amiense de Medio Ambiente, Blas García, a bandeira ízase só nos horarios nos que están os socorristas da praia, porque non pode deixarse durante toda a noite. O servizo de socorrismo está na praia de 11 a 21 horas durante as fins de semana; e de luns a venres, só entre as 15 e 21 horas. Neste horario, os socorristas encárganse de colocar a bandeira no mastro, pero retírase fóra desa marxe para evitar as súas subtracción. O edil indicou que se estaban preparando uns carteis para colocar na praia fluvial. Aínda así, insistiu en que o Concello de Ames recomenda non usar as zonas de praia ata que se teñan todos os resultados das analíticas das augas.