A intelixencia artificial esperta interese entre as persoas de máis idade de Galicia
REDE
O 75% dos case 500 galegos que participaron nos cursos impartidos na rede CeMIT teñen máis de 55 anos
11 dic 2024 . Actualizado á 13:42 h.Preto de 500 persoas participaron ata o de agora nos cursos de familiarización cos usos cotiáns da intelixencia artificial (IA) promovidos pola Xunta na rede de aulas CeMIT repartidas por toda Galicia. A maior parte, preto dun 74%, foron persoas de máis de 55 anos.
Neste momento están a piques de rematar as formacións correspondentes coa terceira edición desta iniciativa, nas que a participación creceu nun 50% con respecto á primeira, do 2022. Ao finalizar os cursos, este ano serían ao redor de 220 persoas as que asistisen ás formacións que se están desenvolvendo en 16 aulas das catro provincias. Súmanse así ás 162 persoas que acudiron o ano pasado ás 14 sesións desenvolvidas en sete aulas; e ás máis de cen da primeira.
Como sucede na maior parte das actividades que acolle a rede de aulas CeMIT de formación en competencias dixitais, no curso participaron máis mulleres que homes, cun 59%, fronte a un 41%. Estes cursos enmárcanse na estratexia galega de apostar pola intelixencia artificial ética e segura ao servizo das persoas e como oportunidade de desenvolvemento e igualación de oportunidades entre os ámbitos rurais e urbanos. Neste mesmo contexto, o executivo galego acaba de aprobar o primeiro proxecto de lei sobre IA que se tramita nunha rexión europea e que proximamente será debatida polo Parlamento.
A intelixencia artificial é unha tecnoloxía que Galicia utiliza para mellorar a calidade de servizos como a sanidade e a saúde, a xestión ambiental, a loita contra os incendios, a procura de emprego, a xestión agraria e gandeira ou os propios servizos da Administración. Nalgúns casos, a familiarización con esta tecnoloxía pode acelerar o uso de ferramentas moi útiles, como os asistentes virtuais ou as ferramentas de IA xenerativa.
Os cursos desenvolvidos nas aulas CeMIT consistiron en sesións de 90 minutos, nos que as persoas asistentes coñeceron casos prácticos de uso da intelixencia artificial na vida cotiá, así como formación sobre as posibles barreiras ou dificultades, ou sobre os posibles riscos nos que se pode incorrer. Os asistentes puideron coñecer, por exemplo, as tecnoloxías de IA que empregan dispositivos cotiáns, como os teléfonos móbiles. Tamén recibiron información sobre o funcionamento doutro tipo de ferramentas, como os tradutores simultáneos, os asistentes persoais ou a xeración de imaxes, entre outros.
Estes cursos, que corresponden cunha das medidas previstas na Estratexia Galega de Intelixencia Artificial, tamén forman parte dos obxectivos de alfabetización dixital contidos da Estratexia Galicia Dixital 2030, en concreto no que se refire á configuración dunha sociedade dixital e inclusiva. Ademais de impulsar a educación dixital para facer fronte ás necesidades socioeconómicas, esta liña estratéxica busca promover as competencias dixitais «para non deixar a ninguén atrás». Galicia foi unha das primeiras rexións en adaptarse ao Marco Europeo de Competencias Dixitais, e as aulas CeMIT son un dos principais escenarios de formación para a adquisición da nova Certificación Galega en Competencias Dixitais, cuxos exames foron convocados por primeira vez este ano e continuarán no 2025 con novos chamamentos.