O lume forestal de Vilaboa confirma que a ameaza incendiaria mantense á falta duns días para que por fin cheguen as ansiadas choivas, tal e como indican as previsións
24 ago 2025 . Actualizado á 05:00 h.Na mesma semana en que vimos como a politización enlamaba o debate sobre os incendios forestais en Galicia, sentimos en Pontevedra como a ameaza do lume achegábasenos perigosamente. O incendio ocorrido na aldea de Paradellas, en Santa Cristina de Cobres, en termo municipal de Vilaboa, é dicir, apenas a unha ducia de quilómetros da praza da Peregrina, lémbranos a todos que a ameaza persiste e aproxímase. Escribino hai unha semana, parafraseando ao presidente da Xunta. Quédannos aínda máis días de sufrimento, tantos como os que falten para a chegada do bombeiro máis eficaz de Galicia, as ansiadas choivas. Se Meteogalicia atina, a mediados da semana que vén. Mentres, aínda que os políticos se empeñen na refrega dialéctica e axiten a rúa, a crúa realidade impón priorizar a seguridade das persoas e os bienes e, por tanto, a apagar os lumes con todos os medios posibles.
Que siga a UME
A petición de Alfonso Rueda ao Ministerio de Defensa para que non retire aínda aos efectivos da Unidade Militar de Emerxencias que acudiron a reforzar o dispositivo de 3.000 brigadistas forestais despregado nestas semanas de lume e fume será atendida. Polo visto o Goberno central planificaba a desescalada de soldados e maquinaria desprazados, pero onte mesmo a ministra Margarita Robles, en visita ao cuartel da Brilat asegurou que «a UME permanecerá o tempo que faga falta».
O titular da Xunta entende que non se pode baixar a garda aínda, quedan días de calor e vento que fomentan a actividade incendiaria que tras cebarse coa provincia de Ourense e algo en Lugo, comeza a aparecer en Pontevedra. Porque para o presidente galego «a intencionalidade parece indubidable» nos incendios xurdidos o xoves tanto en Mougás-Oia como en Santa Cristina de Cobres-Vilaboa.
Grazas ao traballo de compañeiros de La Voz de Galicia como Marcos Gago e Carlos Punzón coñecemos que sospeitas se manexan tras ambos os incendios. No de Oia, os propios bombeiros forestais están convencidos de que «quen o prendeu sabía o que ía causar». No caso da aldea de Paradellas, foi o propio alcalde de Vilaboa quen sinalou unha probable imprudencia. «Todo apunta a que a orixe do lume foi una neglixencia de alguén facendo unha roza», declarou o rexedor, César Poza.
Resulta inexplicable como vendo o dano causado nas montañas de Ourense, en Peña Trevinca e noutras paraxes belísimas do noso territorio, aínda poida haber descerebrados que se expoñen a causar un lume con traballos agrícolas inapropiados nas condicións meteorolóxicas actuais. En canto a quen só prenden para causar dano, só cabe tratalos como criminais e aplicarlles o Código Penal con toda crueza.
Fogos artificiais
Outra variante do asunto vén dada pola decisión duns concellos galegos en xeral e pontevedreses en particular de suspender espectáculos pirotécnicos fronte ao criterio doutros que os mantiveron e celebrado. Pode parecer unha decisión cosmética, pero somos moitos os convencidos de que está fundamentada pola situación excepcional de risco que vivimos.
O caso de Pontevedra é paradigmático. O Concello prohibiu «ata novo aviso» a tirada de lumes e cohetería nas quince parroquias do rural, así como no centro urbano, pero en cambio, mantivo e celebrou os tres espectáculos pirotécnicos clásicos de cada Semana Grande das Festas da Peregrina. O argumento esgrimido polo Concello é que esas tres tiradas de lumes celebradas na contorna do río Lérez, entre as pontes do Burgo e de Santiago, contaban con todas as medidas necesarias incluíndo perímetros de seguridade, persoal especializado e equipos de emerxencia para responder a calquera continxencia. E certamente celebráronse sen problema ningún.
Outros dous concellos ribeiregos tomaron medidas drásticas. En Marín, a alcaldesa María Ramallo comunicou a suspensión da tirada de lumes na praia de Loira polo risco que entrañaba para os montes próximos. E en Sanxenxo, o goberno de Telmo Martín decidiu que non habería bombas de palenque nas festas patronais do municipio como tampouco nos festexos de Bordóns nin na Lanzada. Só se manterá o espectáculo pirotécnico nocturno na praia de Silgar porque os lumes se lanzan cara ao mar e conta cun plan propio de seguridade.
A batalla da rúa
Na inevitable politización que trae consigo esta nova vaga de lumes, tanto o BNG como o PSOE e as súas correas de transmisión sindicais e ecoloxistas lanzáronse ás rúas en veintitantas cidades, con desigual resposta. En Vigo por certo sumouse á foto a vicepresidenta Yolanda Díaz, de vacacións por aquí. Outra concentración foi en Pontevedra, na praza da Peregrina e coincidiu co incendio declarado en Vilaboa e o desaloxo de varias vivendas. Mentres uns protestaban contra a actual Xunta, a pronta resposta das brigadas con motobombas apoiadas por helicópteros e hidroavións contivo o avance das chamas cara aos núcleos habitados e non houbo desgrazas persoais.
Cando pase todo isto, que vinga o debate que se precise sobre o modelo forestal que se quere para Galicia e depúrense culpas de cada quen. Agora, de momento, non toca.