Morre aos 49 anos o pontevedrés Pablo Hinójar, referente da ximnasia en Galicia e seleccionador nacional, mentres competía en Madrid

Esnaquizada. Así está a ximnasia galega e española este sábado de outubro tras coñecerse a noticia do falecemento do pontevedrés Pablo Hinójar Rey, unha figura referente deste deporte tanto en Galicia como en España, xa que era seleccionador nacional das modalidades de acrobacia, dobre minitramp e tumbling. Tiña só 49 anos de idade e a morte sobreveulle mentres durmía Madrid, a cidade á que se desprazou xunto a deportistas como Melania Rodríguez, campioa de Europa e do mundo, para participar nunha competición. Faleceu por causas naturais, previsiblemente un infarto, aínda que será a autopsia a que aclare suceder. 

Pablo Hinójar era un referente descomunal da ximnasia en Galicia. Convertérase nunha figura respectada despois dunha vida de sacrificio dedicada de maneira total ao deporte. Antes de ser un recoñecido adestrador foi deportista. Nado en Madrid, chegou de neno a Pontevedra. Foi aos 16 anos cando descubriu o deporte que lle marcaría a vida. Como contaba a este xornal nunha entrevista, foi vendo pola televisión os Xogos Olímpicos de Seúl, en 1988, cando quedou prendado do que facían os ximnastas. Empezou a adestrar de forma autodidacta, pola súa conta, ata que unha persoa vinculada ao deporte viuno «facendo o cabra», tal e como el contaba entre risos, e díxolle que se apuntase ás escolas municipais pontevedresas. Aí empezou a súa carreira como ximnasta, na que logo se uniría ao club Treboada. Competiu primeiro en ximnasia artística e logo cambiouse xa á modalidade de trampolín, participando en numerosas competicións nacionais e traendo ata Pontevedra un bo número de medallas. 

Aquel rapaz que facía piruetas creceu e converteuse no adestrador que sempre levara dentro. Deixou o club que lle vira crecer e creou unha entidade propia, o Ximnasia Pontevedra, que se converteu en todo un referente mentres a súa carreira como adestrador non deixaba de crecer. Reivindicativo ata máis non poder, nunca deixou de pelexar para que os ximnastas contasen con mellores instalacións e para que se lle dese á ximnasia a importancia que el cría que merecía. Directo, sincero e sempre envorcado cos seus, dáballe igual expresar as súas críticas a pé de competición que a micrófono aberto, como cando lle deron un premio como deportista no 2015 na súa cidade e aproveitou para reclamar instalacións dignas. Así era Pablo, pura enerxía e pura loita sempre. 

O ano 2011 supuxo un antes e un despois na súa vida, xa que se converteu en seleccionador nacional de ximnasia acrobática e de trampolín. Mantívose no posto ata o 2019, cando decidiu centrar todo o seu esforzo en adestrar a Melania Rodríguez para os Xogos Olímpicos de Tokio. A carreira da ximnasta e a súa foron sempre da man e as hemerotecas están fartas de fotografías de ambos celebrando os seus grandes logros; desde o campionato do mundo do 2023 ao de Europa este mesmo ano. Eran adestrador e pupila pero tamén amigos íntimos, de aí a desolación total da deportista neste sábado de traxedia. 

Taras un parón para centrarse na carreira de Melania Rodríguez, Pablo Hinójar regresou ao seu posto de seleccionador nacional no ano 2021 e actualmente mantíñase nel. Precisamente, como tal estaba esta fin de semana en Madrid, onde se celebraba unha competición. Fontes próximas á federación sinalaron que todo foi con normalidade ata esta mañá, cando Pablo foi atopado morto no lugar onde durmía. Prevese que sexa trasladado a Pontevedra, onde vivía coa súa nai. Nela e na súa dor pensaban numerosos compañeiros da federación, deportistas e adestradores que enmudecían ao saber que Pablo deu este sábado, sen que ninguén o agardase, o salto que non lle tocaba dar. 

A Consellería de Presidencia, Xustiza e Deportes lamentou a morte de Pablo Hinojar, «unha das figuras máis importantes do noso deporte» e anunciou que será «condecorado coa distinción ao mérito deportivo da Xunta de Galicia, a título póstumo».  

---

---

---