A presidenta de Stop Accidentes, ante a polémica autovía que se constrúe en Pontevedra: «Invito o ministro a polbo, pero que antes pasee polo Lérez»

Vinte anos leva xestándose en Pontevedra a construción da A-57, en principio concibida como unha circunvalación á cidade e actualmente prevista como unha autovía, e outro tanto tempo levan os veciños das parroquias de Xeve e Bora loitando para dar un xiro ou directamente eliminar este proxecto. Por que o fan? Por numerosas razóns, entre elas o feito do trazado da nova estrada practicamente calca ao da AP-9, que consideran que non responde a unha necesidade real, que se trataría de construír por construír, e sobre todo e ante todo, que supón un machadazo no corazón rural de Pontevedra. «É o noso muro de Berlín», din a miúdo os afectados. Á súa causa sumouse esta mañá unha voz coñecida e recoñecida en Galicia, a de Jeanne Picard, presidenta de Stop Accidentes e namorada dos proxectos a favor da seguridade viaria e os peóns que son marca da casa do Concello de Pontevedra.

Precisamente, foi por aí por onde empezou ela, recoñecendo que non entende como un Concello «que é un exemplo internacional a seguir, permita algo así». Picard falou de todas as repercusións negativas que terá esta obra, entre elas levar por diante o proxecto para ter un camiño seguro cara ao colexio de Santo André de Xeve, no que a entidade que preside colabora man a man coas Administracións. Picard sinalou, dirixíndose a Óscar Ponte, ministro de Transportes e Mobilidade Sostible e xa que logo máximo responsable desta millonaria actuación viaria (só un tramo de cinco quilómetros custará 105 millóns de euros): «Invito o ministro a polbo, pero que veña a ver isto, levámoslle a pasear polo río Lérez. Que isto, a min que xa teño unha idade, sóame a Franco. Entón había unha canción que dicía algo así como ´señor ministro, arránxenos a estrada´... xa temos moitas estradas. Consérvenas en bo estado e punto», indicou Jeanne Picard. 

Na mesma mesa sentáronse esta mañá de mércores Jeanne Picard, dúas das portavoces da plataforma contra a A-57 e tamén Sabrina Portela, directiva da asociación de pais do colexio de Xeve. Aínda que repasaron todas as causas polas que están en contra deste trazado, do que se está executando o primeiro tramo e está proxectado o segundo (que sería o que tocaría a Bora e Xeve) e o terceiro (que chegaría ata o municipio de Barro), a presenza de Picard e da directiva do ANPA estaba xustificada porque ían falar da repercusión negativa que terá a autovía para o colexio de Xeve, situado nun cruzamento perigoso. De feito, Sabrina Portela explicou que lvos pais levan dez anos pelexando para que este centro conte cunha senda peonil e que agora mesmo están en execución eses traballos. Sinala que o proxecto do ministerio tiraría abaixo todo ese labor da última década da comunidade educativa, xa que en canto se faga a nova estrada a autovía quedará a cen metros e posiblemente haxa unha ligazón na contorna deste colexio rural. E engadiu: «O noso colexio está nunha contorna privilexiada, rodeado de natureza que se vai destruír. Temos unhas condicións que non só atraen á xente das parroquias rurais, senón que veñen nenos de Pontevedra, da cidade, porque temos un patio enorme, que presenta uns valores que á xente lle atraen. Todo isto se iría ao traste con esa autovía». Engadiu que será imposible dar clase se un día se poñen en marcha as obras, con todo o ruído que implicarán. 

Jeanne Picard, pola súa banda, contou que Stop Accidentes leva anos facendo un proxecto na contorna do colexio de Santo André de Xeve, da man da Xunta e o Concello, para lograr unha contorna escolar segura e saudable. Sinalou que esta actuación está na recta final e que agarda que pronto haxa unha senda peonil para que os nenos poidan chegar camiñando ás aulas sen que iso supoña un perigo. De feito, o conxunto de obras programadas  na zona neste sentido supera os dous millóns de euros. Di que, neste contexto, chámalle moitísimo a atención que as Administracións implicadas en mellorar esa seguridade viaria, fundamentalmente a Xunta e o Concello, permitan «que todo isto vaia a quedar destruído». E explica o seguinte: «Non podo entender que un Concello como o de Pontevedra, que é un modelo internacional por como mellorou a calidade de vida dos cidadáns vaia a deixar pasar isto. Nestas zonas os veciños viven nunha contorna verde, co río Lérez. Aquí hai toda unha política ambiental que se vai destruír cunha estrada, que chaman autovía, que non vai a ningunha parte. Xa temos unha autoestrada para cruzar Galicia, Pontevedra non necesita unha autovía». Indicou que Europa está a reclamar menos vehículos privados e que «cantas máis estradas, máis circulación e máis contaminación». Invitou a facer as cousas ao revés: «Temos estradas convencionais e se hai diñeiro e fondos europeos, o que hai que facer é arranxar e conservar esas estradas».

Picard fixo un chamamento á cordura, a non lanzarse á construción dunha plataforma así sen ter claro o seu sentido: «A quen vai dar servizo esa autovía, onde están os veciños, onde quedan as persoas maiores ou os escolares ou os que van traballar a Pontevedra e non teñen un transporte público adecuado?. Non poden nin sequera ir andando, que son cinco quilómetros nada máis. Temos que dar servizo aos veciños, calidade de vida. Unha autovía non é a solución». E aí foi cando invitou o ministro a que veña a Galicia, a que pasee polo río Lérez e os camiños do rural pontevedrés para que entenda que este proxecto non é sinónimo de calidade de vida para os veciños. «Construímos por unha banda e destruímos polo outro, é máis importante o diñeiro ou a vida?», acabouse preguntando a micrófono aberto. 

Así rematou unha nova comparecencia da plataforma de afectados pola autovía, que está a lograr apoios de distintos ámbitos, entre eles o de todas as organizacións ecoloxistas. E que recentemente anunciou que a loita se dirimirá nos tribunais, xa que se prevé denunciar ante a Audiencia Nacional o proxecto que se expón para dar continuidade á A-57; un viario preñado de polémica que tras anos de obras aínda non está concluído nin o primeiro tramo.

---

---

---