Confirman que o despedimento de Toni Otero por parte do Pontevedra CF foi improcedente
PONTEVEDRA CIDADE
O TSXG mantén que debe ser indemnizado con sete mil euros
28 mares 2024 . Actualizado ás 09:55 h.O Tribunal Superior de Xustiza de Galicia (TSXG) desestimou o recurso de suplicación interposto polo Pontevedra CF contra a sentenza do Xulgado do Social número tres de Pontevedra que declarou improcedente o despedimento de Toni Otero como director deportivo da entidade granate. A sentenza, en todo caso, é recurrible en casación.
O alto tribunal galego confirma, deste xeito, que o Pontevedra CF deberá indemnizar a Otero con sete mil euros, cantidade á que haberá que aplicar os descontos oportunos.
A sentenza establece que en xuño do 2021 subscribiuse o contrato indefinido polo que Toni Otero comezou a realizar labores de director deportivo. Case un ano e medio máis tarde, o 20 de xaneiro do 2023, asinouse un «Pacto de modificacións contractuais» entre o Pontevedra CF e o propio Otero polo que se modificaba a categoría profesional de director deportivo para que puidese desempeñar as funcións propias de adestrador, labor que se solaparía coa que xa viña facendo no conxunto de Pasarón.
O TSXG considera que este pacto supuxo unha novación de contrato que modificou os haberes salariais que percibía o traballador, así como a súa categoría profesional.
Deste xeito, no momento do seu cesamento, considérase que prima esta nova categoría profesional, a de adestrador, o que implica a aplicación do Real Decreto 1006/1985 que regula a relación laboral especial dos deportistas profesionais. «Non póndose en dúbida que as funcións do actor sexan as de adestrador, procede a aplicación da normativa reclamada, é dicir o Real Decreto mencionado. E como consecuencia a indemnización mínima no mesmo pactada, como consecuencia do cesamento», engade a resolución.
O tribunal, de igual modo, descarta as alegacións do Pontevedra CF relativas a que se debe atender á primeira retribución pactada. Neste sentido, remárcase que «o aumento salarial se aplicou por realizar esas funcións de adestrador e é o que estaba a percibir na data de efectos do despedimento (...), non estando ante unha remuneración irregular ou un incremento puntual».