O Pontevedra recibirá aos cachorros de catro grandes equipos en senllas xornadas
03 oct 2019 . Actualizado ás 05:00 h.A vitoria en Oviedo foi en palabras de Luismi «unha explosión de alegría» que deberá persistir para afrontar unha das partes do calendario máis complexas do curso. A sorte foi caprichosa co Pontevedra que o obriga a medirse a cinco filiais en cinco partidos seguidos. Atrás queda xa o Oviedo B, pero agora empezará a rolda máis esixente ao recibir ao Atlético de Madrid B, visitar o campo do Castela e pechar o ciclo co Xetafe B en casa e co Celta B en Barreiros.
Un derbi porá o colofón a un mes marcado pola mocidade duns equipos aos que o conxunto granate sempre teme . «Se teñen o día, pódencha lear», comenta Luismi tras o adestramento deste mércores en Pasarón. Serán catro partidos nos que o Pontevedra terá que abusar, no bo sentido da palabra, da súa experiencia. A falta da presión por acadar un obxectivo na liga non resta competitividade ao filial, pero si que lle fai xogar máis cómodo. «O seu obxectivo, sempre competindo, é intentar sacar xogadores para o primeiro equipo. Aúnan calidade e talento, que se o acompañan de traballo é perigoso», confesa Luismi. Con todo, sabe que cando están nun aperto poden pagar a «novatada».
A experiencia e a experiencia son as armas que apontoarán os granates nos próximos encontros. A primeira proba de lume será o domingo ás 17 horas contra o Atlético de Madrid B. As renovacións nestes equipos fan que cada ano apenas garde relación co anterior. «Iso demostra a dificultade destes persoais, son cada vez máis competitivos, cambiaron a tendencia e agora apertan sen balón», destaca Luismi, que se bota a vista atrás comproba que non han ir tan mal os resultados cos filiais. Gañaron ao Sporting B en Pasarón e ao Oviedo B no Requesón. E fixérono con nove. A consecuencia das expulsións de Nacho López e Berrocal seguirán esta fin de semana. Ningún deles poderá xogar en Pasarón e Luismi profunda máis nos problemas cos laterais. «Non conseguimos estabilizalos, é normal que veñan sancións e lesións», recoñece o míster, que agarda recuperar Álvaro Bustos para o domingo. Esta semana está a adestrar á marxe do equipo por un forte golpe no pé. «Está a traballar á parte co fisio, parece unha lesión sen importancia e agardamos que este xoves poida volver ao grupo», sinala Luismi.
A vitoria en Oviedo tranquilizou uns días previos algo convulsos sobre a situación do equipo e abriu as portas da confianza para a próxima xornada. «Nós diciamos que no vestiario non nos importaba esa presión, proba diso é que se non estivésemos ben, fose imposible gañar en Oviedo», conclúe o míster.