Un incendio forza o desaloxo dun edificio de vivendas en Marín e o traslado a Montecelo de dous veciños
MARÍN
As chamas orixináronse no segundo piso e tamén afectaron outros dous
30 may 2024 . Actualizado á 16:39 h.Un incendio urbano forzou o desaloxo dun edificio de vivendas en Marín e o traslado ao Hospital Montecelo, en Pontevedra, de dous dos seus inquilinos, segundo informou o servizo de emerxencias 112 Galicia. O incidente produciuse ás 3.45 horas cando se recibiu o aviso dun incendio nun piso do número 166 da avenida de Jaime Janer, situada cara ao final desta arteria principal da localidade, en Coirados. O Concello de Marín explicou que a Policía Local e os bombeiros dos parques do Morrazo e de Ribadumia persoáronse no lugar para atender os veciños e combater as chamas, que acabaron danando seriamente o segundo piso, afectando a outros dous e enchendo de fume o resto. Este é o terceiro incendio urbano en dúas semanas en Marín, xa que os anteriores foron un lume que se orixinou nun coche dentro dun garaxe nunha travesía de Ezequiel Massoni, afortunadamente sen feridos, e outro nunha vivenda e un coche no barrio de San Pedro.
O 112 Galicia comunicou que o aviso do lume o realizou un dos veciños deste inmoble de catro plantas, engadindo que «o fume comezara a propagarse por todas as instalacións e o alertante confirmaba que había xente no resto de vivendas». Outras chamadas advertiron de que escoitaban explosións no domicilio afectado polas chamas. Ante a gravidade dos feitos mobilizouse aos bombeiros, a Policía Nacional, a Policía Local e ao 061.
O servizo de emerxencias indicou que, pouco despois do aviso, «os axentes da Policía Nacional confirmaron que todos os veciños foran desaloxados e que os medios de extinción xa traballaban para controlar as lapas. Ao mesmo tempo, os profesionais sanitarios trasladaron a dúas persoas por inhalación de fume leve ao Hospital de Montecelo».Os bombeiros manifestaron ao 112 que «arderon por completo varias estancias dun piso, afectando tamén ao teito».
Pola súa banda, desde o Concello de Marín indicouse que se está investigando a orixe do lume e que as dúas persoas trasladadas en ambulancia, unha o foi ao parecer pola inquedanza que lle causou o suceso e a segundo por inhalación de fume.