O concerto será o 2 de marzo, ás 22 horas, e con entradas a 20 euros
13 feb 2024 . Actualizado ás 10:08 h.A Festa do Lacón con Grelos de Cuntis cumpre 25 anos e para celebralo o Concello incorporou á programación un concerto do cantante cordobés Antonio José. O artista de Palma del Río actuará o 2 de marzo, sábado, ás 22 horas na Rúa Pedro Campos, nas inmediacións do pavillón de deportes da vila termal. As entradas, ao prezo de 20 euros, xa se poden adquirir a través da plataforma virtual woutick.
Desde o goberno local destacaron este sábado que Cuntis será unha das paradas do Tour O Pacto, que comparte título co último disco de Antonio José, que repasará tamén as súas cancións máis coñecidas. O artista andaluz, de 29 anos, ten unha ampla traxectoria con 8 discos publicados e conta con máis de tres millóns de seguidores nos seus perfís oficiais. A Festa do Lacón celebrarase do 1 ao 3 de marzo. Entre os días 21 e 28 de febreiro pódense solicitar as reservas para a degustación do día grande da cita gastronómica, o domingo 3. Para facer este trámite pódese usar a mesma plataforma woutick ou contactar coa Oficina Municipal de Información Xuvenil (OMIX).