Caldas investirá 580.000 euros na mellora e humanización da contorna do río Bermaña
CALDAS DE REIS
A actuación afectará a unha superficie de 3.229 metros cadrados. O proxecto busca tamén reforzar a accesibilidade e seguridade viaria
09 novs 2021 . Actualizado ás 13:29 h.O Concello de Caldas de Reis prevé investir case 580.000 euros na mellora e humanización da rúa Río Bermaña e na praza Doutor Sesto Casal, no centro urbano. A actuación acometerase coa subvención aprobada pola Deputación de Pontevedra, no marco do programa ReacPon para a reactivación económica da provincia e o cumprimento dos principios e obxectivos da Axenda 2030. Unha axuda de 492.824 euros. O concelleiro de Obras, Manuel González (PSOE), lembrou que este proxecto estaba previsto no Plan de Mobilidade Urbana Sustentable aprobado polo Concello no 2019 e que desde entón se avanzou en diversos trámites (redacción do estudo previo e do proxecto de execución, solicitude de informes sectoriais e obtención do financiamento necesario).
A actuación afectará a unha superficie de 3.229 metros cadrados e o proxecto, sinalou este martes o goberno local, pretende , mediante a reforma do viario e o espazo público, non só a rehabilitación paisaxística integral dunha área central e moi sensible polos seus valores naturais, senón mellorar a accesibilidade e a seguridade viaria. Tamén se prevé crear novos espazos de calidade ambiental, incorporando vexetación autóctona e mobiliario urbano. Todo o ámbito de actuación terá plataforma única, dando prioridade á mobilidade peonil e ciclista.
O alcalde, Juan Manuel Rey (PSOE), agradeceu á Deputación a aprobación da subvención e destacou o seu apoio para os investimentos dos concellos no desenvolvemento de obras vertebradoras da reordenación urbana. O rexedor apunta que a obra que se vai realizar na contorna do río Bermaña permitirá «mellorar a calidade de vida da veciñanza e facer de Caldas unha vila máis accesible e atractiva».