Traballou en empresas do sector da automoción, na costura de asentos
28 ene 2020 . Actualizado ás 09:31 h.«Era un sol de muller». Así, con esas palabras, definía onte Orlando Aboy á súa esposa, Teresa Carreira, que faleceu despois de pelexar duro contra unha enfermidade. Teresa marchouse demasiado pronto, aos 43 anos. E fíxoo sen renderse nin un só día, sorrindo a pesar de todo e cunha valentía tan grande que era capaz de dar ánimos aos que a querían e víana apagarse.
Teresa era natural da Lama. Concretamente, da parroquia de Antas. Naceu nunha familia de catro irmáns e, hai xa dúas décadas, comezou a súa relación con Orlando Aboy, con quen levaba dez anos casada. El tributoulle onte unha cariñosa despedida na súa Facebook, na que lle agradecía os anos que pasaron xuntos. «Grazas por ter tido a fortuna de coñecerche a ti e á túa familia, grazas por todos estes anos xuntos nos que fuches a miña amiga, a miña compañeira, o meu confidente e a miña esposa. Grazas por todo o que me ensinaches ao longo deste camiño que percorremos xuntos. Grazas, sobre todo, por estar comigo e ao meu lado e apoiarme nos malos momentos», dicíalle.
Un aluvión de mensaxes trataban de insuflar ánimo ao viúvo e á familia. E lembraban a Teresa como unha persoa íntegra, amiga dos seus amigos e boa compañeira alí onde traballou. Non en balde, moitos a coñecían por ter coincidido con ela nalgunha das empresas do sector da automoción na que se empregou na costura de asentos. Así, traballou en Treves, Tierry Michael Compoñentes ou Copo Ibérica. Velouse en Pontevedra e o seu funeral estaba previsto que se celebrase onte, luns, en Santiago de Antas (A Lama).