O movemento veciñal galego acorda en Pontevedra protestas contra as comisións bancarias
14 jul 2025 . Actualizado á 10:21 h.O movemento veciñal galego reuniuse en Pontevedra e dous foron as principais cuestións sobre a mesa: as dificultades de acceso á vivenda e as comisións dos bancos. A sesión de Cogave, a Confederación Galega de Asociacións Veciñais, celebrouse no local da Federación Castelao porque a entidade pontevedresa asume a súa presidencia. Ao encontro desenvolvido o xoves seguirá outro, se non hai cambios, o próximo 26 setembro. Antes de entrar en materia, fíxose unha radiografía da situación do movemento veciñal na comunidade. «Vívese un momento bastante bo, dado que moitas das reivindicacións escóitaas a parte política ou senón as asume como súas aínda que nazan nos movementos veciñais», comentou Juan Manuel Loureiro, presidente de Castelao.
Para os representantes veciñais a vivenda é un problema fundamental e principal na actualidade, «tanto para a xuventude como para o resto de poboación, independentemente da súa idade», ao que non é alleo Galicia. Din desde Castelao e Cogave que queren trasladar á Xunta varias cuestións. «Chegamos tarde, pero hai que axilizar os prazos en todos os concellos de Galicia, con máis ou menos densidade de poboación, pero ten que ser unha norma para todo o mundo, de que todas as tramitacións de vivendas que faga a Xunta ou vaian destinadas a alugueiro deben ter unha prioridade total na tramitación deses expedientes». Ao mesmo tempo, as entidades consideran que todas as vivendas que están a cargo da Sociedade de Xestión de Activos Procedentes da Reestruturación Bancaria (Sareb) deberían pasar a patrimonio autonómico para que poidan porse en alugueiro para as familias. Por que? «Porque se non estamos cometendo o erro de que as vivendas que promete Galicia como mínimo son dous anos e a xente moza e normal, do común, non pode esperar e non poden vivir nin na súa localidade», expón Juan Manuel Loureiro. Propoñen que esas vivendas da Sareb pasan a unha lista pública onde os demandantes de vivenda póidanse apuntar coas condicións que procedan de vivendas públicas ou sociais.
Unha das causas do problema da vivenda, tanto na cidade como xa no rural, é a prevalencia, subliñan, dos pisos turísticos. «Xa sabemos que existe unha normativa, pero pedimos que calquera edificación que teña un negocio turístico ou hostaleiro ten que ter unha placa identificativa», algo que axudaría a destapar os pisos ilegais, sosteñen desde Cogave. Que pide tamén unha campaña de control deses aloxamentos turísticos.
Á marxe da problemática da vivenda, Cogave impulsará concentracións ante as entidades bancarias para expresar as súas queixas por unhas comisións de mantemento que consideran «sanguentos». «Queremos facelas todos xuntos e con carácter inmediato», avanzou o presidente de Castelao. Tamén teñen previsto acudir ao Defensor do Pobo, ao Banco de España e ao Goberno central.