Pecha Karma, a sala de Pontevedra que descubriu a Love of Lesbian ou Arde Bogotá: «Dos catro negocios de antes do covid, non queda ningún»
PONTEVEDRA
Marcos Rivas, propietario do local, cruza os dedos para que a baixada de persiana non sexa definitiva: «Por mor dunha denuncia temos que acometer unha obra moi potente... é unha situación moi complicada»
14 dic 2023 . Actualizado ás 17:36 h.Marcos Rivas Vidal, un empresario de Pontevedra máis que coñecido mundo da musica en Galicia, onde leva dúas décadas «cumprindo o soño» de descubrir e apoiar a grupos emerxentes que logo rebentan grandes escenarios, confésase triste. «Tristísimo», di el. Di que ese é o sentimento que lle embarga tras ter baixado a persiana dunha sala mítica na cidade do Lérez, de Karma . Por que pecha este local fetiche da música independente, que programaba sesenta concertos ao ano e que en marzo cumpriría vos 18 anos de idade? «Karma pecha de forma indefinida, e agardemos que non definitivamente, porque, por mor de unha denuncia, temos que facer unha obra enorme. Temos que adaptarnos á actual normativa de ruídos e de incendios e iso supón un investimento moi potente», comeza dicindo Marcos Rivas. Non discute que teña que levar a cabo eses traballos, pero dóelle que o motivo sexa unha denuncia: «Levamos 18 anos e nunca tivemos problemas. Claro que todos nos deberiamos adaptar ás normativas, pero que sexa algo que se esixa a todo o mundo, non por mor de algo así, e xusto antes de Nadal, pensei que poderiamos pasar as festas. Hai unha chea de locais que están como nós, pero tocounos», sinala. Logo, mirando ao escenario do seu local, polo que pasaron innumerables grupos que agora triunfan nos escenarios de toda España e que Karma contribuíu a descubrir, como poden ser Love of Lesbian, Arde Bogotá ou Zahara e por suposto tamén músicos galegos emblemáticos como todos os compoñentes dos Piratas, Sinistro Total ou Iván Ferreiro, conclúe: «Dos catro negocios de antes do covid, non queda ningún».
O dono de Karma leva varias décadas da súa vida no mundo da noite e da música. Hai 18 anos montou a sala Karma nun soto da rúa Riestra , en pleno centro de Pontevedra. Era un local xa mítico de saír de marcha, no que houbera sempre discotecas, como Vías, Riestra ou Why?. El puxo en marcha un proxecto totalmente distinto, centrado en concertos en directo, en música independente e no apoiar a grupos emerxentes. A máis diso contar continuamente con figuras imprescindibles da música nacional, por exemplo o desaparecido Javier Krahe, que actuou en numerosas ocasións en Karma. O local foi converténdose nun espazo mítico, nese lugar polo que pasaron decenas de grupos indie aos que poucos coñecían e que, un ano ou dous despois, reunían a miles de persoas en festivais de todo o panorama nacional. E durante moito tempo formou parte da ruta de salas de músicas independentes de toda España. «Todo o mundo quería vir tocar aquí», indica Marcos Rivas.
A pandemia asestou un golpe durísimo a todo o lecer nocturno e Karma tamén se resentiu, loxicamente. Pero o negocio logrou remontar o voo e asinou un ano 2022 tremendo: «Programamos sesenta concertos, foi unha tolemia, pero estivo xenial», sinala o responsable do local. En paralelo, mentres as cousas ían ben con respecto á programación musical e ao público, comezaron a preocuparse pola situación do soto. «Levamos ano e medio con todo este problema. Presentamos un papel tras outro, fomos recorrendo... e sabiamos que tarde ou cedo nos acabarían pechando porque por mor de denunciarnos íannos obrigar a adaptarnos ás novas normativas de incendios e ruído. Temos que tramitar unha nova licenza, con todo o que iso implica». Esa notificación chegoulles fai cousa dun mes e tiveron que baixar a persiana e suspender catro concertos que tiñan programados. Ao principio, levaron todo este asunto en silencio, tratando de dar longas a quen non paraban de preguntar que ocorría coa sala, ata que decidiron facer un comunicado sobre o peche a través das redes sociais. «Non quedou máis remedio, estaba a preguntarnos e queriamos dar explicacións», indica Marcos Rivas.
O empresario non soamente está triste por Karma, unha sala á que non chama negocio senón «soño feito realidade», senón porque é o cuarto negocio que pecha tras o covid. Así, explica que no 2002 botou o ferrollo a O Pequeno que, como o seu nome indica, era o irmán chiquito da sala de concertos. Este local levaba entón doce anos no candelero, ofrecendo tamén música en directo, e por el pasaran artistas como Cora Velasco, Querido Estraño ou Tony Lomba. No caso do Pequeno, o peche veu dado pola baixada de público na noite pontevedresa e tamén por non chegar a un acordo coa caseira. Esa clausura tamén implicou que Rivas baixa a persiana de Pequeno Exotic, xa que era un bar que estaba xunto ao Pequeno e que se complementaba con el. E, a maiores, tamén se despediu de outro espazo de hostalería que tiña na cidade do Lérez, a Taberna Ou´Salnés. Pola contra, abriu outro bar, o Pandereitas e continúa tamén adiante coa súa empresa de eventos, coa que realiza festivais como o Surfing the Lérez.
Que posibilidades hai de que Karma reabra as súas portas? Marcos Rivas encóllese de ombros: «Non depende de nós. Presentamos no Concello dous anteproxectos da obra que temos que facer. E estamos co proxecto definitivo, pero é mesmo estamos afectados por Patrimonio porque temos preto as Ruínas de Santo Domingo. Entre outras cousas, hai que retirar as escaleiras de baixada ao soto e cambiarlles a forma. É un investimento moi grande, pero temos bastante avanzada o financiamento e chegamos a un acordo bo co caseiro. Veremos que sucede, se se pode ou non. O que non creo é que reabramos se temos que pasar un ano pechados... iso non o aguanta ningún negocio», conclúe Rivas.