Os casos de covid dispáranse a 156 na área de Pontevedra, con 41 contagios
PONTEVEDRA
No CEIP Álvarez Limeses da cidade fixéronse 80 probas, e o Sergas levará a cabo un cribado en Forcarei a fin de semana
19 novs 2021 . Actualizado ás 05:00 h.Os casos activos de covid seguen subindo na área sanitaria de Pontevedra e O Salnés, que onte acadou os 156. Supoñen 32 infeccións máis que o día anterior e na última xornada confirmáronse por PCR 41 novos contagios no territorio. É a cifra máis alta de novas infeccións desde o 26 de agosto, en plena quinta onda. As persoas que necesitan ingreso hospitalario son 3, todas en planta, dúas en Montecelo e unha no comarcal do Salnés, en Vilagarcía. O resto de infectados, 153, teñen síntomas leves ou son asintomáticos e están nos seus domicilios, onde teñen que gardar corentena durante dez días. O aumento de contagios coincide cun incremento das probas PCR. No último día efectuáronse 386, fronte ás 238 e 167 das dúas xornadas precedentes.
Os municipios con peor evolución son Pontevedra, Sanxenxo e Forcarei. Na capital, onde este xoves se fixo un cribado a alumnos de infantil do CEIP Álvarez Limeses, rexistráronse 38 positivos na última semana, 56 en 14 días. Nese centro educativo hai tres aulas pechadas de infantil. En Sanxenxo os seus 11 casos afloraron na última semana, mentres que en Forcarei a incidencia acumulada está disparada ao ser un municipio con pouca poboación (3.308 habitantes). Segundo o mapa de Sanidade ten 14 casos en 7 días, e 21 en 14, superando a súa incidencia os 250 e os 500 casos por cen mil habitantes, respectivamente. O Sergas anunciou onte un cribado en Forcarei, ao que están convocados 1.600 veciños con idades comprendidas entre os 40 e os 75 anos. Terá lugar este sábado e domingo, 20 e 21 de novembro, no centro de saúde, en horario de 9 a 14 e de 16 a 20 horas. Para facer as probas haberá dous equipos de enfermería por tuno. O obxectivo do cribado é detectar portadores asintomáticos do virus para reducir a cifra de contagios nesta localidade.