Anulada en Pontevedra a primeira multa en Galicia por saltarse o confinamento en Tui tras a sentenza do Tribunal Constitucional

A recente anulación por parte do Tribunal Constitucional do decreto que estableceu o estado de alarma pola pandemia do coronavirus e, xa que logo, declarou nulas as restricións á mobilidade empeza a ter consecuencias. Deste xeito, o Xulgado do Contencioso-Administrativo número uno da cidade de Pontevedra ditou a primeira sentenza de Galicia na que se revoga unha multa por saltarse o confinamento. Deste xeito, na resolución estímase o recurso interposto contra a decisión da Subdelegación do Goberno de Pontevedra por un veciño de Tui que foi sancionado con 601 euros por saír a un parque infantil coa súa filla. Isto implica que a Administración terá que devolverlle os 300,5 euros que abonou no seu día ao acollerse ao desconto por pronto pagamento.

Nesta resolución xudicial, fronte á que non cabe recurso algún e, xa que logo, é firme, refire especificamente que a prohibición de circulación establecida no Real Decreto 463/2020, polo que se decretou o estado de alarma, «acaba de ser declarada nula polo Tribunal Constitucional». Ademais, incídese «con carácter expreso» en que tal declaración de nulidade afecta, retroactivamente, ás sancións administrativas impostas por incumprir o confinamento.

Deste xeito, e neste caso concreto, o recorrente, que se atopaba nun parque infantil do paseo de Tui ás sete menos vinte da tarde do 31 de marzo do 2020, acompañado pola súa filla, foi multado «única e exclusivamente por ter incumprido, sen causa xustificada, a prohibición de circulación». O pontevedrés, pola súa banda, explicou no xuízo que se viu obrigado a baixar ao parque porque a menor «entrou en estado de inquedanza tras varios días de peche».

Pola súa banda, o Estado, extremo ao que se alude na sentenza, instou a «a suspensión do proceso por descoñecer o contido detallado da sentenza do Tribunal Constitucional, á espera de que se publique no BOE». Con todo, o maxistrado da cidade do Lérez entende que non é necesaria esa espera «pola sinxela razón de que no recurso de inconstitucionalidade foi parte o Poder Executivo, representado e defendido polo Avogado do Estado, quen recibiu xa a notificación do contido íntegro da sentenza, que se publicou completa hai xa uns días na web oficial».

Ademais do fallo do Tribunal Constitucional, o xuíz advirte de que, neste caso, concorre outra causa adicional de anulación da multa, «por infrinxir os principios de legalidade e tipicidad». A este respecto, apúntase que o recorrente e a súa filla regresaron ao seu domicilio cando llo requiriron os axentes da Garda Civil, de tal modo que se alude a que a totalidade dos xulgados contencioso-administrativos da provincia de Pontevedra emitiron «multitude de sentenzas sobre casos análogos» nas que anularon as sancións ao non ter desobedecido os multados unha orde directa ditada por un axente da autoridade, senón os mandatos dunha disposición de carácter xeral.

---

---

---