Operarios de Ence e empresas auxiliares mobilízanse ante a Delegación do Goberno na Coruña

Un numeroso grupo de traballadores de Ence e de empresas auxiliares e do sector forestal concentrouse esta mañá na cidade da Coruña, ante a Delegación do Goberno en Galicia. Os manifestantes, convocados por Comisións Obreiras, reclaman unha entrevista urxente co máximo representante da Administración estatal en Galicia, Javier Losada, para expor a súa gran preocupación polo futuro da fábrica de Pontevedra e consecuentemente dos seus postos de traballo. Comisións Obreiras non participou na anterior reunión de Losada co comité de empresa da fábrica de Ence, á que asistiron UGT, CIG e un vogal independente.

Os manifestantes cortaron o tráfico na contorna onde se atopa a Delegación do Goberno e forzaron que na entrevista que lles concede Losada figuren cinco persoas, en representación do persoal da fábrica, as empresas auxiliares e o sector forestal. 

A compaña fai gala da eficiencia enerxética da súa planta de Lourizán

Pola súa banda, Ence destacou esta mañá o seu compromiso co impulso da eficiencia enerxética tanto na súa liña de negocio da celulosa como da enerxía renovable, así como das súas plantas de produción. No caso de Pontevedra e Navia, a compaña sostén que a madeira certificada é unha materia prima natural e sostible e que é o «punto de partida dun proceso produtivo no que se fabrica a pasta de papel, coa que se elaboran productos reciclables, capaces de substituir ao plástico e a outros materiais non reciclables». 

Nesta mesma liña, tanto en Lourizán como en Navia, Ence «xera enerxía renovable utilizando para iso biomasa forestal, é dicir, os materiais procedentes da madeira que non se destinan á produción de celulosa: cortiza e lignina». A lignina é «un compoñente da madeira que constitúe un excelente biocombustible renovable e natural». Con esta metodoloxía, as dúas fábricas son capaces de autoabastecerse enerxeticamente, e contribuír á redución da intensidade enerxética e a pegada de carbono.

Ence subliña que levou adiante investimentos en Pontevedra que ata o o 2019 supuxeron 132 millóns de euros para avanzar en materia de eficiencia. Ademais, a pasteira incide en que tanto Navia como Pontevedra dispoñen do recoñecemento Residuo Cero de Aenor e que a factoría de Lourizán obtivo recentemente a certificación ISO 500001 de Eficiencia Enerxética. Esta é unha norma de aplicación voluntaria que acredita o seu compromiso e preocupación ambiental para contribuír a reducir a emisión de gases de efecto invernadoiro, así como que o consumo enerxético se faga de xeito racional, apuntan desde a empresa.

Para rematar, Ence apuntou que a xeración de enerxía renovable con biomasa «constitúe un claro exemplo de eficiencia enerxética» porque «se trata dun proceso no que se valorizan restos agroforestais que, doutro xeito, poderían chegar a supoñer un problema ambiental debido ao risco de queimas sin control e incendios que implica a súa acumulación». Abunda a pasteira en que coa xeración de biomasa «contribúe a combater a denominada España baleirada e a xerar emprego no ámbito rural».

A Fiscalía Provincial de Pontevedra investiga a seguridade de Lourizán

Pola súa banda, a Fiscalía Superior de Galicia informou que a Fiscalía Provincial de Pontevedra abriu onte de oficio unhas dilixencias de investigación penal tras ter coñecemento das últimas declaracións efectuadas polo presidente de Ence sobre Lourizán, en relación a un posible risco ambiental con posible afectación para as persoas. A Fiscalía Provincial acordou, entre outras dilixencias, a remisión de oficios ao Seprona e a varias consellerías da Xunta solicitando informes respecto ao estado da planta pontevedresa.

 

---

---

---