Búscase un dianteiro nacional con experiencia en Segunda B
PONTEVEDRA
O Pontevedra ultima a incorporación de José García á disciplina de Pouso
21 ene 2020 . Actualizado ás 05:00 h.José García xa estivo este domingo vendo ao que nas próximas horas será o seu novo equipo. A falta de que se dea o ok definitivo para vestir a camiseta granate, o club confirmou que a fichaxe está pechado e que nos próximos días incorporarase á disciplina de Carlos Pouso. É probable que mesmo poida ser mañá cando se enfunde a camiseta granate.
Pero mentres se agarda a chegada da primeira fichaxe do Pontevedra para o medio campo, as miradas seguen encamiñadas cara á falta de gol. Urxe un dianteiro. Demándao a afección e sábeo o club, que nas últimas semana escruta o mercado en busca do perfil que quere incorporar para esa posición. Se fose un clásico anuncio por palabras podería resumirse así: Búscase dianteiro nacional con experiencia en Segunda B. Tocouse algún dianteiro de Segunda División, pero foi imposible. Este domingo, o míster aseguraba que se agora tivese que decantarse por un mediocentro creativo ou un dianteiro, teríao claro. Hai que solucionar a falta de gol do equipo.
Pouso asegurou no programa En Xogo da TVG que coa figura de Romay e de Álvaro Bustos poderíase sobrevivir ben no centro do campo, pero a falta de gol é máis urxente. Non hai que pasar por alto que despois de tres derrotas consecutivas, os seguintes dous partidos contra o Coruxo e o Racing de Ferrol acabaron con senllos 0-0. Estes resultados relanzan as carencias dun equipo, cuxo máximo goleador é Bustos.
Fuentes próximas ás negociacións recoñecen que salvo un xiro de última hora, non será ata final de mes cando se peche calquera operación. Os «mellores» xogadores aos que podería acceder o Pontevedra están a agardar a ver se pechan as posibles operacións con equipos de maior categoría ou da propia Segunda B que lle ofrecen máis diñeiro. Se finalmente esas oportunidades non callan, será cando os granates poidan entrar en xogo para facerse cos seus servizos. A situación parece complicada para tratar de incorporar un dianteiro que soluciones as carencias ofensivas do Pontevedra.
Polo momento, os únicos movementos do club son a saída de Alfredo Mejía e a chegada de José García. O mediocentro pamplonica está no seu último ano sub-23 e hai poucos días abandonou a disciplina do Atlético Baleares, ao que pertencía. Na última tempada tan só disputou 87 minutos co conxunto balear. Comezou a súa carreira no Osasuna e despois pasou polo Alcoyano e o Estremadura, que o cedeu primeiro ao Salamanca e despois ao Baleares.