Plan para eliminar bigotes e penes pintados no cruceiro das Cinco Cales
PONTEVEDRA
A peza, do século XVIII, presenta desde hai algún tempo varios grafitis realizados con rotulador azul
19 ene 2020 . Actualizado ás 05:00 h.O histórico cruceiro da praza das Cinco Cales, situado en pleno centro histórico de Pontevedra, sufriu fai uns meses un atentado vandálico en forma de pintadas sobre varias das figuras que compoñen a peza, datada no século XVIII. Concretamente, segundo informa a área de Patrimonio Histórico do Concello, o ataque consistiu «na pintada duns grafitos realizados con rotulador azul, nas figuras de Adán e Eva e de dúas ánimas do Purgatorio que decoran a vara». Nunha das figuras os vándalos pintaron un bigote e nas outras, órganos xenitais masculinos.
O concelleiro responsable de Patrimonio, Xaquín Moreda (BNG), prevé iniciar en breve os traballos de restauración da peza, para o que xa se contratou á empresa especializada BIC Materiais e Conservación e contactouse con Patrimonio da Xunta para obter o pertinente permiso. «Dada a importancia artística do cruceiro e a localización nunha zona do casco vello moi turística, a concellaría de Patrimonio Histórico foi consciente da necesidade de realizar unha intervención mínima que eliminase os graffitis, procurando sempre conservar a pátina da pedra», explican desde o Concello.
Así, o proxecto de restauración que trasladou o Concello á Xunta «irá encamiñado, fundamentalmente, á limpeza das pintadas». Faranse probas previas con diversos disolventes, comezando polos máis inocuos, «para elixir o máis axeitado e que non altere a pátina da pedra». O método de aplicación, continúan desde Patrimonio Histórico, «será mediante compresas de polpa de papel, cubríndoas cun filme transparente para evitar a evaporación rápida, e deixando actuar o disolvente ata abrandar a pintura, controlando moi ben o tempo de traballo, de xeito que esta poda retirarse despois con algodón ou cepillando con pinceis e, puntualmente, con bisturí ata a súa completa eliminación».
Unha obra de cantería reclamada por Lourizán
O cruceiro das Cinco Cales é unha peza patrimonial datada no século XVIII, adornada con varias esculturas que se estenden polo fuste o capitel e a cruz. Orixinalmente estivo situado no barrio de Estribela, e non foi ata os anos 60 do século pasado cando se decidiu o seu traslado ao centro histórico. Hai uns anos, varias entidades veciñais de Lourizán esixiron ante Patrimonio a súa volta á súa localización orixinal.