A Confederación Hidrográfica e o Concello investirán máis dun millón de euros
04 may 2024 . Actualizado ás 05:00 h.As obras para eliminar as verteduras do río Limia están en marcha. O presidente da Confederación Hidrográfica do Miño-Sil, José Antonio Quiroga, visitou onte a localidade de Xinzo de Limia xunto ao alcalde, Amador Díaz, para comprobar o avance do proxecto, no que a autoridade de augas e o Concello investirán máis dun millón de euros. O río que pasa pola capital da Limia está afectado por verteduras que non están conectados á rede municipal e que non se someten a ningún tipo de tratamento.
As obras consistirán na construción dun colector na marxe esquerda do río para recoller as verteduras das que agora son as áreas máis críticas de contaminación. Situarase entre a avenida de Portugal e a avenida dúas de Maio. Almacenará os residuos procedentes das edificacións da zona así como das piscinas municipais, do pavillón e outras instalacións deportivas. Desde ese punto, realizarase un cruzamento subterráneo cara ao parque do Toural e mediante unha estación de bombeo levarán as augas residuais ata enlazar coa rede municipal de saneamento, que canaliza a auga á estación depuradora de augas residuais (EDAR) de Xinzo.
O novo colector funciona por gravidade, pero ao estar nun terreo tan chairo, é necesaria a construción da estación de bombeo. En total, actuarase nun tramo dunha lonxitude duns 1.200 metros.
Finalmente, o proxecto inclúe unha terceira estación de bombeo de augas residuais que parte do pozo onde antigamente vertía o matadoiro Rubio , situado na marxe dereita do río Limia antes de enlazar coa avenida de Portugal. Canalizará a auga ata un pozo da rede municipal no parque da marxe dereita do río.
Estas obras estaban programadas inicialmente para novembro de 2023, pero empezaron este luns 29 de abril. O seu inicio tivo que posporse debido ás intensas choivas que afectaron á zona, que se atopaba moi encharcada. «Esta decisión tomouse co fin de garantir a seguridade e a eficacia dos traballos», apuntaron desde o Concello. A obra foi adxudicada en outubro do 2023 á empresa Misturas, S.A.
O alcalde de Xinzo de Limia, Amador Díaz, destacou a importancia destes traballos para o municipio: «Son fundamentais para preservar a saúde do noso río Limia e garantir un entorno máis limpo e seguro para todos os veciños». A Confederación defendeu que a colaboración institucional é a clave para conseguir este tipo de proxectos, esenciais para preservar e mellorar a calidade das augas das canles fluviais. «É fundamental a implicación dos gobernos locais como canle de comunicación máis directo e claro, polo coñecemento que posúen das necesidades reais das zonas que representan», engadiu José Antonio Quiroga. Por iso, agradeceu a implicación do goberno de Xinzo. O rexedor tamén valorou o traballo da autoridade de augas e asegurou que continuarán traballando para preservar o medio ambiente e mellorar a calidade de vida do concello.