Marta Nóvoa deixará o Parlamento para gobernar San Cibrao das Viñas

O Partido Popular sumou un concelleiro máis no consistorio tras as eleccións en San Cibrao das Viñas. Marta Nóvoa, que substituíu como cabeza de lista a Manuel Pedro Fernández, conseguiu once edís, dos trece cos que conta o Concello. Os outros dous concelleiros son para o PSOE. Estreouse como candidato Rafael Rodríguez Villarino, co que baixou un concelleiro a representación socialista.

«Estou moi contenta, o apoio foi brutal. No 2019 tivemos o respaldo do 68% dos votantes e nestas eleccións foi do 72,7%. Aumentamos na zona urbana e mantivémonos no rural», sinala a futura rexedora. Explica que o reto que se marcou durante a campaña era manter, polo menos, a ampla maioría de concelleiros do seu antecesor. «Ao final conseguimos un máis e iso dáte moita máis forza», engade a popular. Nóvoa non é nova en labores municipais, xa que leva doce anos ao lado de Manuel Pedro Fernández, desde o 2015 como tenente de alcalde. Por iso, afirma, non comezará a traballar senón que seguirá cos proxectos xa en marcha. «Agora mesmo xa estamos inmersos nos campamentos de verán e nas actividades estivais, como excursións ou rutas. Ademais de continuar cunha serie de obras que xa comezaron», explica.

O seu novo cargo como alcaldesa de San Cibrao das Viñas leva consigo a renuncia á súa acta de deputada no Parlamento de Galicia. Nóvoa é, actualmente, viceportavoz do Partido Popular e portavoz de Industria. A saída de Marta Nóvoa supón a entrada dun novo deputado por Ourense. Sería o valdeorrés Moisés Blanco. «De momento non o pensei. Aínda que estaba case claro que Marta ía ser alcaldesa, hai que agardar ata o 17 de xuño [data de constitución das novas corporacións municipais] para tomar a decisión», afirma Blanco Paradelo.

Este mércores celebrouse pleno no Parlamento de Galicia e Marta Nóvoa recibiu a felicitacións dos seus compañeiros: «Dixéronme que me van a estrañar. Foi moi bonito».

---

---

---