O público da MIT de Ribadavia premia unha obra sobre a reconversión industrial en Vigo
RIBADAVIA
Ibuprofeno Teatro leva un dos galardóns máis agardados da Mostra Internacional de Teatro
28 jul 2025 . Actualizado a las 18:54 h.Reconversión, da compañía galega Ibuprofeno Teatro, recibiu o Premio do Público da MIT de Ribadavia. Escrita e dirixida por Santiago Cortegoso, trátase dunha proposta de gran formato con oito actores-músicos que, convertidos nunha charanga, interpretan en directo a banda sonora dun espectáculo que mestura o íntimo co político. A historia reconstrúe a reconversión industrial na ría de Vigo a través dunha figura central: o pai do autor, que traballou durante tres décadas no estaleiro Ascón e viviu en primeira persoa o peche da factoría en 1984 e as intensas mobilizacións dos anos 70 e 80. Trátase, afirman desde a compañía, dunha viaxe desde a posguerra ata o Felipismo, pasando polo auxe da industria siderúrxica e a evolución desde un estilo de vida rural a unha sociedade capitalista. Na segunda posición segundo o voto do público quedou Ovvio, de Kolektiv Lapso Cirk. O terceiro posto foi para Grandissima Illusione, de Cris Blanco.
O Premio do Público da Mostra Internacional de Teatro de Ribadavia recoñece as propostas que máis conmoven e conectan cos espectadores, facéndolles partícipes na construción do palmarés do festival.