Traballa en Coren, ten a súa propia hamburguesería e está a piques de crear a súa propia marca con menos de 35 anos

Gabriel Alonso (Carballeda de Avia, 1989) é unha persoa inconformista e inqueda. Empezou a traballar en Coren ao rematar a ESO e case vinte anos máis tarde aínda segue alí. Pero non é a súa única ocupación. Chegou a ser concelleiro en Carballeda de Avia. Cursou varias formacións de carpintería polas tardes e, mentres tanto, empezou a interesarse pola hostalería. «Quería inverter os meus aforros nun negocio propio, así que montei a cafetería The Boot, en Ribadavia, no 2019», conta. «Queriamos algo diferente, que fose comercial e bonito», engade. No 2022 quixo traspasalo e cambiar de proxecto, pero non o conseguiu. «Puxemos o cartel pero no último momento, animado polos amigos e clientes, decidín botar un aniño máis», explica. O que pasou foi que nesa marxe de tempo, ocorréuselle unha idea de negocio máis grande aínda. «Fixen un plan de empresa e apostei polas hamburguesas. No 2023 reformei o local por completo e agora acabamos de presentar o produto», di Gabriel. Trátase de smash burgers, esa versión das clásicas americanas que levan dobre carne esmagada contra o ferro, o que dá como resultado unhas hamburguesas saborosas pero crujientes. «Son tres ingredientes básicos, da mellor calidade, aos que apenas hai que sumarlles nada máis: pan brioche, cunha porcentaxe moi alta de manteiga; carne de vacún; e queixo chédar», resume este emprendedor do Ribeiro.

«Rapidez, calidade e sencillez son as claves do meu negocio», asegura. De feito Gabriel afirma que, desde que os camareiros toman a comanda, a hamburguesa tarda preto de dez minutos en estar servida. Á opción clásica, súmanselle outras sete versións. «A que máis se vende é a que leva crema de trufa. Tamén a temos con salsa barbacoa ou con ensalada, entre outras», di. En The Boot poden compartirse tres primeiros. Antes de fincarlle o dente á hamburguesa é posible degustar uns aros de cebola crujientes, uns nuggets de pito (dos que tamén teñen unha opción vegana) ou unhas patacas con beicon e cebola frita. «Comezamos este mes e a verdade é que a acollida está sendo moitísimo mellor do que nos agardabamos», afirma Gabriel, xa ten claro cal é o seguinte paso. «A miña intención é crear unha marca propia de hamburguesas, abrir novos locais e tamén traballar con foodtruck (camión de comida) en distintos festivais», conclúe.

Por agora, gozar da súa proposta 100 % americanas é posible en Ribadavia. The Boot abre todos os días de oito da mañá a once e media da noite, pero funciona como hamburguesería só as noites de venres, sábados e domingos.

---

---

---