Ribadavia aproba o proxecto de saneamento e beirarrúas para a travesía de San Cristovo
RIBADAVIA
![Pleno del Concello de Ribadavia.](https://img.lavdg.com/sc/2SMFA0Ebm9Hh-eM31k-LN1GMQvw=/480x/2022/03/31/00121648756321952132229/Foto/RIBAD.jpg)
O convenio coa Hidrográfica permitirá un investimento de 800.000 euros para renovar as canalizacións na localidade
01 abr 2022 . Actualizado á 05:00 h.Ribadavia deu o visto e prace á aprobación inicial do proxecto de novo saneamento e novas beirarrúas na OU-504, ao seu paso pola localidade de San Cristovo de Regodeigón. Hai un ano xa que Concello e Confederación Hidrográfica Miño-Sil (CHMS) asinaron un convenio que xa se comezara a preparar con Ignacio Gómez (PSOE) como alcalde, no 2019. O proxecto redactouse en outubro pasado e o pleno aprobou este xoves, por unanimidade, a renovación das canalizacións. Calcúlase que a obra se adxudicará nun par de meses. O Concello negocia coa Xunta, titular da estrada, a prolongación do proxecto en 550 metros. De paso, Ribadavia pediralle á Axencia de Infraestruturas que mellore a seguridade viaria na zona. Todos os grupos apoiaron por unanimidade a aprobación.
O pleno aprobou actualizar o canon da concesionaria do abastecemento de auga, Aqualia, sen que supoña modificar a taxa que pagarán os veciños. O portavoz do goberno, Brais Fidalgo, apuntou que estima que o Concello non terá déficit por iso xa que se compensará cun aumento do censo de casas.