Participan nun plan piloto para o que tamén se seleccionaron bosques de castiñeiros do Courel, O Incio e Paradela
17 dic 2023 . Actualizado ás 16:52 h.Mellorar a xestión dos bosques de castiñeiros tradicionais e impedir o seu abandono son os obxectivos prioritarios dun plan de xestión conxunta impulsado pola Xunta de Galicia no que participan seis municipios galegos. Tres deles, Folgoso do Courel, O Incio e Paradela, están na provincia de Lugo. En Ourense sitúanse os tres restantes: O Bolo, A Veiga e Parada de Sil. Neste último concello o conselleiro de Medio Rural, José González, visitou un dos soutos acollidos a este plan de recuperación e conservación.
González estivo acompañado polo director xeral de Ordenación e Planificación Forestal, José Luis Chan, o alcalde de Parada de Sil, Aquilino Domínguez, e a presidenta e varios integrantes da asociación de propietarios de soutos do canón do Sil, Mónica Bizarro.
A mellora destes bosques leva a cabo mediante agrupacións forestais de xestión conxunta, unha figura que aparece contemplada na lei autonómica para a recuperación de superficies agrarias. Segundo estimacións de Medio Rural, ata a data investíronse nas provincias de Lugo e Ourense 131.500 euros destinados a unha superficie total de 356,38 hectáreas. O fomento do asociacionismo é un dos obxectivos do programa estratéxico do castiñeiro e a produción de castaña que deseñou a consellería.
A asociación de propietarios de soutos do canón do Sil, segundo destacou o conselleiro na súa visita, será das primeiras en constituírse en Galicia como agrupación forestal de xestión conxunta. González avanzou en Parada de Sil que os orzamentos da Xunta do próximo ano inclúen unha partida de 2,4 millóns para o fomento deste tipo de agrupacións. O plan valora, entre outros aspectos, o papel dos bosques de castiñeiros para reducir a pegada de carbono e na política forestal de prevención dos incendios forestais.
O proxecto de Parada de Sil intégrase, segundo informa, Medio Rural nun plan piloto no que participan soutos situados en sete emprazamentos de Galicia. En Lugo sumáronse a esta iniciativa bosques de castiñeiros en Vilar (Folgoso do Courel), San Pedro do Incio e Paradela. A consellería sinala que unha vez seleccionados estes soutos comezaron os traballos de para «revisión do parcelario, estudos previso de investigación da titularidade e apoio técnico» a posta en marcha das agrupacións de xestión conxunta.
O Diario Oficial de Galicia publicou o pasado 6 de novembro varios modelos tipo de estatutos para constituír estas agrupacións. José González anunciou Parada de Sil que este luns sairán no DOG unha resolución pola que a Xunta destina preto dun millón de euros ao fomento da plantación de castiñeiros destinados a froito e a mellora de soutos tradicionais.