Fíxose pasar por xestor inmobiliario e estafou a un cliente co aluguer dunha vivenda en Ourense

Dous meses de traballos en beneficio da comunidade. É a condena á que terá que facer fronte un home que ante a maxistrada do Xulgado do Penal dous de Ourense admitiu cometer un delito de estafa. Aínda que inicialmente se pedira para el unha medida de privación de liberdade, dado o seu recoñecemento dos feitos acordouse un reproche penal algo menos severo, por uns feitos que tiveron lugar en marzo do ano 2021.

Nesas datas o acusado era compañeiro sentimental dunha muller que tiña unha axencia inmobiliaria. Aproveitándose dos datos de pisos que ela tiña, o acusado contactou cun particular e ofreceulle arrendar unha vivenda da capital, enganándoo para que lle entregase non só o diñeiro do primeiro mes, senón tamén a fianza e outra cantidade en concepto de seguro. En total, o prexudicado perdeu preto de 900 euros, que agora poderá recuperar. A sentenza é firme.

---

---

---