A gala solidaria Por Eles Tea reivindicou o dereito das persoas con síndrome de espectro autista a vivir plenamente integrados na sociedade
14 abr 2024 . Actualizado ás 05:00 h.O Auditorio de Ourense vestiuse de festa este sábado para recibir por centos de ourensáns que acudiron a gozar da segunda gala solidaria organizada pola Asociación Por Eles TEA para concienciar sobre a realidade das persoas con síndrome de espectro autista e pórlle rostro: o de tres membros do colectivo que se dirixiron ao público para expresar os seus sentimentos e reivindicacións. A cita estivo chea de música e baile e tivo ao actor e escritor galego Pablo Piñeiro como mestre de cerimonias nunha cita cunha longa lista de colaboradores que quixeron apoiar a causa: Estudo Repenica, a banda Tango & Cash, as escolas de baile Catro Pasos e Tics e o Coro Universitario do campus de Ourense na faceta artística; e firmas como Eroski, Rocholl, Hotel Oca Vila de Allariz , Oryctes, Coren, Galfor, Mur Marxinal, Impervegal, o Centro Comercial Ponche Vella, Madeiras Rubén, A Zapatería do Avó e Hotel Altiana
A gala serviu de marco para presentar outra cita solidaria: a Carreira Benéfica Pilar 2024, que se celebrará en outubro. O encargado de convocar aos cidadáns para participar foi o subdelegado do Goberno en Ourense, Emilio González, que acudiu á festa de Por Eles TEA acompañado do comandante da Garda Civil de Ourense, Rafael Berguillo, e o capitán do subsector de Tráfico , Javier Barja. A carreira farase coincidir coa celebración da patroa da Benemérita e a recadación que se consiga entregarase a esta asociación ourensá que traballa para axudar ás persoas con autismo .