A federación ourensá de asociacións de persoas con discapacidade quere ter máis presenza no rural
OURENSE CIUDAD
Miguel Ángel Quintas, presidente de Alcer Ourense, encabeza o novo equipo directivo de Discafis-Cogami
01 may 2024 . Actualizado á 10:43 h.Impulsar a participación activa das entidades e persoas con discapacidade das zonas rurais da provincia ourensá é un dos obxectivos que se marca a nova xunta directiva de Discafis-Cogami, a federación que reúne a 17 asociacións que orientan o seu traballo para mellorar a autonomía das persoas con discapacidade física e orgánica e a súa participación plena na sociedade. Miguel Ángel Quintas presidirá durante os próximos catro anos a entidade, acompañado de José Luís Parada como vicepresidente; Mónica Limia como secretaria xeral; Laura Quintas (quen dirixiu a federación durante doce anos) será a tesoureira da entidade; e como vogal estarán Lorena Quintas, Lorena Rodríguez, Concepción Crespo e Susana Álvarez.
Miguel Ángel Quintas anunciou que o equipo centrará os seus esforzos en mellorar a empregabilidade do colectivo pero tamén en defender e garantir a igualdade de oportunidades para as persoas con discapacidade, especialmente no caso das mulleres e os menores. Quintas non é novo nos labores de xestión en entidades sociais. Despois de varios anos formando parte da directiva da asociación de enfermos do ril Alcer Ourense, asumiu a presidencia do colectivo o ano pasado e forma parte do grupo de dirección da Federación Alcer Galicia. «Esta nova etapa supón un orgullo completo, sempre foi unha máxima persoal axudar e estar dispoñible para os demais, na procura da mellora do seu benestar», asegura tras recoñecer que que poñerse a cargo dunha federación con 17 colectivos integrados «é un gran reto».