Quince adegas participan no certame que reúne a 73 denominacións vitivinícolas
07 feb 2024 . Actualizado ás 05:00 h.Quince adegas valdeorresas teñen presenza na Barcelona Wine Week que se está celebrando na capital catalá. Trátase dunha das citas de referencia para o sector que este ano reúne a 73 denominacións de orixe. Este é o segundo ano no que participa este territorio do oriente da provincia ourensá e o presidente do Consello Regulador da D.Ou. Valdeorras, José Ramón Rodríguez Casteláns aseguraba sentirse orgulloso da participación neste foro coas 26 marcas que levaron á feira as empresas vinícolas que se sumaron á iniciativa.
Nesta edición da Barcelona Wine Week hai preto de mil expositores, unha cifra marca nunca antes acadada, segundo resaltan desde a organización do certame que destaca o interese crecente de todos os sectores ligados ao mundo do viño. Casteláns destacou a oportunidade que supón «poder achegar os nosos viños brancos e tintos a diferentes prescriptores e público especializado neste salón que se significa especialmente por contar cun programa divulgativo moi interesante que inclúe clases mestras e relatorios sobre as últimas tendencias do campo do viño ou sobre cuestións que afectan o noso ámbito de actividade, como pode ser a procura dun modelo de produción cada vez máis sostible».