A ourensá Rita Doallo fala do valor da familia no seu primeiro conto, unha historia chea de aventuras
28 mares 2023 . Actualizado ás 05:00 h.A ourensá Rita Doallo é autora do conto Bigote de tres pelos, unha historia preciosa e tronchante na que, da man do avó Luis e o seu reivindicativo mostacho, profunda no valor da familia e na importancia de envellecer cheos de vida e movemento. «Principalmente quería facer un libro que fora para divertirse pero que tivera unha base bonita detrás. Saíu isto e estou moi contenta», admite. De darlle forma ás súas ideas con ilustracións coloridas encargouse Miguel Robledo e a edición é de Aira. «Ademais está escrito en galego porque eu apoio a crianza neste idioma e quería aportar recursos aos pais e nais. É algo que me interesa moito porque vexo que cada vez os cativos falan menos na nosa lingua, a pesar de que na casa lles falemos nela. A min pásame cos meus fillos», engade.
Rita estudou Traballo e Educación Social e desde o 2016 xestiona unha casa neno en Taboadela, á que chamou Parruliña. Admite que sempre lle gustou escribir. «Estaba un pouco desconectada e durante o peche da pandemia, que eu paseino embarazadísima, unha amiga pasoume uns textos meus de fai anos e recordei todo o que me gustaba escribir así que volvín», admite. De feito a historia de Bigote de tres pelos ten polo menos unha década. «Polo medio morreu o meu pai e decidín reformular o texto para que estivese vinculada á súa figura», conta. No libro, ao avó Luis acompáñalle o seu case despoboado mostacho e tamén o seu neto, Breo, unha homenaxe ao fillo maior de Rita.
A ourensá xa non vai deixar de escribir. Está a facer unha mentoría coa autora de literatura infantil e xuvenil Gracia Iglesias e en canto remate porase a presentar textos ás editoriais. Iso será a partir de verán. Agora está ilusionada coa promoción do seu primeiro conto, que pode comprarse en Espazo Nobel, en Eixo e no Sindicato do Cómic. Precisamente na primeira delas preséntao en Ourense o 15 de abril. O día 22 farao no Casino de Lalín e o 13 de maio na tenda Arrolos de Mai en Vigo. «Estou moi contenta porque con este libro saquei un pedaciño de min a fóra. Asusta pero foi unha experiencia moi chula e espero repetila», remata.