Adeus a Aurelio Gálvez, xefe de bombeiros de Ourense durante catro décadas
OURENSE CIDADE
O profesional viviu cambios importantes no corpo, como o traslado da sede desde As Mercedes ata A Chavasqueira, e sucesos terribles, como a morte dun compañeiro nun incendio
05 novs 2022 . Actualizado ás 05:00 h.Ourense perde ao que durante anos ocupou o posto de xefe de bombeiros da cidade. Aurelio Gálvez Prieto morreu este xoves aos 79 anos, unha década despois de que se xubilase á fronte do servizo de extinción da cidade e tras ter desenvolvido a súa profesión durante 43 anos. De profesión aparellador, incorporouse como xefe do servizo no ano 1969, cando na cidade das Burgas era alcalde David Ferrer.
Moitos outros rexedores ostentaron o bastón de mando nos anos posteriores pero Gálvez mantívose no seu posto, atravesando situacións no seu traballo que, segundo recoñecía tempo despois, o marcaran. A máis dramática foi o incendio que tivo lugar o 21 de outubro de 1996 no garaxe do edificio Viacambre. Na extinción daquel lume faleceu un compañeiro de 37 anos. Na súa última etapa tamén lle tocou vivir outras desgrazas, como a morte dun home ao derrubarse un edificio en Villa Valencia ou o incendio da capela dos Remedios.
Con Gálvez á fronte, a base do servizo trasladouse desde a praza das Mercedes ata a sede actual da Chavasqueira, inaugurada no ano 1993.
Aos 69 anos, e por vontade propia, este veterano profesional decidiu xubilarse e nunha entrevista a La Voz salientaba entón que o paso o deu «por vontade propia» e coa ilusión de pasar máis tempo cos seus seres queridos. «Disfrutar da familia é a miña prioridade e será a miña única ocupación a partir de agora. Nin penso en outra cousa» aseguraba entón. Hoxe a súa contorna chora a perda.
