A Administración Autonómica destina 828.000 euros a sufragar os custos laborais de beneficiarios da Risga que traballarán nove meses para 36 concellos ourensáns
26 may 2022 . Actualizado ás 05:00 h.Unha trintena de concellos ourensáns poderán contratar a preto de 80 perceptores da Risga —a renta de inclusión social de Galicia destinada a garantir axuda económica de subsistencia a quen careza doutros recursos— para realizar obras ou servizos nos seus municipios. A Xunta destina preto de 828.000 euros a este proxecto que busca que estas persoas vaian adquirindo experiencia e práctica laboral para mellorar as súas posibilidades de inserción no mercado de traballo.
O delegado territorial da Xunta, Gabriel Alén, explicou durante a presentación da iniciativa que o orzamento fixado cobre o custo salarial total destes empregados, incluída a cotización á Seguridade Social, durante un período de nove meses, co que as entidades locais non terán ningún sobrecusto por participar e integrar a estes traballadores nos seus equipos. O obxectivo da medida é conseguir «a mellora da empregabilidade dos colectivos máis vulnerables», sinalou Gabriel Alén.
A repartición por comarcas é o seguinte: A Valdeorras destínanse 74.023 euros para facilitar 6 contratacións nos municipios da Rúa, A Veiga e O Barco de Valdeorras. En Terras de Celanova invístense 168.943 euros para contratar a 15 persoas, das que 5 traballarán para a mancomunidade e o resto repártense entre os concellos de Cartelle, Ramirás, Verea, Padrenda e A Bola. O Ribeiro recibirá 160.273 para contratar a 13 traballadores que se reparten entre Ribadavia (2), Cenlle (1), Leiro (2), Melón (2), Carballeda de Avia (2), Cortegada (2) e Castrelo de Miño (2). Na carballiñesa, haberá 72.831 euros para que o Concello de Maside incorpore a 5 persoas e Boborás a dúas.
A Xunta destina 73.628 euros á comarca de Verín. Castrelo do Val sufragará dous soldos, igual que Monterrei e Oímbra, mentres que en Vilardevós contratarán a un. En Allariz poderán contratar a catro e tamén haberá fondos para financiar cinco contratos en Xinzo, dous en Vilar de Santos e outros tantos en Sandiás, Barbadás, Taboadela, Castro Caldelas, Muíños, Lobios, Pereiro de Aguiar, San Xoán de Río, Rairíz de Veiga, Parada de Sil, A Teixeira, Baños de Molgas, Toén, Bande, O Irixo, Trives e Vilar de Barrio. Os de Amoeiro, Montederramo, Xunqueira de Ambía e Vilamarín poderán contratar a un en cada caso, mentres que Ourense recibirá financiamento para 22.