Hai máis de 2.500 veciños contaxiados, dos que 114 están ingresados nos hospitais ourensáns
06 may 2022 . Actualizado ás 22:33 h.O último reconto do Sergas cifra en 2.532 as persoas que están pasando o virus do covid na provincia de Ourense, 81 máis que na xornada anterior. A razón do incremento non está tanto nos novos contagios, que con houbo 181 na última xornada, unha das cifras máis baixas das computadas desde o 19 de abril; senón ao reducido número de altas que se deron no mesmo día. Foron tan só 97. Tamén sobe, aínda que lixeiramente, a cifra de ingresados nos hospitais ourensáns con covid. Xa son 114, dos que dous necesitan a atención da unidade de coidados intensivos do CHUO. Nese centro están tamén a maioría dos que ocupan cuartos en planta (87) ,mentres que no hospital de Valdeorras atenden a 14, no de Verín a 10 e hai un paciente máis na clínica de Cosaga na capital.
Practicamente a metade dos ourensáns enfermos concéntranse en cinco dos 92 municipios da provincia: Ourense, O Barco, Vilamartín, Verín e A Rúa. A cidade, con 751 afectados, encabeza a lista de infeccións activas seguida do Barco, con 141 e Vilamartín que rexistra 130 e, aínda que é o terceiro por número absoluto, supera de longo aos demais na porcentaxe de poboación afectada (o 7 %). O certo é que a comarca de Valdeorras segue sendo a que peores datos reporta nesta última onda de covid xa que, ademais dos dous anteriores, A Rúa, con 76 persoas enfermas de covid, é o cuarto municipio da provincia con máis afectados. O terceiro posto ocúpao Verín con 123. O resto de concellos está por baixo do centenar de contaxiados. No Carballiño hai 70, en Ribadavia 59, Barbadás e Allariz teñen 52, O Pereiro 45 e con 42 casos están en Xinzo e Celanova. En Coles , o último rexistro do Sergas sitúa a 36 afectados, en Cartelle hai 34, en Vilardevós viven 31, en Muíños outros 29 e en Viana 27. Completan a lista dos territorios con máis de vinte afectados: San Cibrao (26), A Arnoia (25), Monterrei (24), Avión (22), Leiro e Maside (21), e Rubiá (20). Entrimo é o único que, polo menos oficialmente, non ten ningún caso positivo rexistrado polo Sergas.