A denuncia interpúxose en Madrid e o turismo circulaba por unha estrada de Oímbra cando lle deron o alto axentes nun dos dispositivos tras o martes de entroido
16 feb 2024 . Actualizado ás 05:00 h.A Garda Civil do Destacamento de Tráfico de Verín localizó, durante un dos controis de alcol e drogas tras a celebración do martes de entroido, un turismo que figuraba como roubado en Madrid. Nun dispositivo nunha das estradas de Oímbra, os axentes de Tráfico deron o alto, ás doce e media da madrugada do 14 de febreiro, a un vehículo marca Ford ocupado por varias persoas.
Os gardas solicitaron datos da central operativa, onde se verificou que ao vehículo lle figuraba unha denuncia por roubo nunha comisaría do distrito madrileño de Vallecas e unha orde de incautación e detención ou identificación dos seus ocupantes. Así procederon e o condutor, un home de 31 anos veciño de Madrid, terá que responder como investigado como un presunto delito de furto de vehículo. Os demais ocupantes foron identificados.
O Grupo de Investigación e Análise de Tráfico (GIAT) da Garda Civil fíxose cargo das dilixencias, que entregaron no xulgado de garda de Verín.