A cita, que se celebrará o 7 de agosto, recupera a comida popular e as degustacións de pratos elaborados con este produto da zona
31 jul 2022 . Actualizado ás 05:00 h.O 7 de agosto Oímbra recuperará o seu tradicional Festa do Pemento con todos os ingredientes que a converteron nun dos referentes en canto a celebracións gastronómicas na provincia ourensá. Despois de que a pandemia de covid obrigase a que a cita do 2020 cambiase o formato presencial polo virtual, e que ao ano seguinte as degustacións limitásese á oferta que fixeron os bares cumprindo os condicionantes sanitarios que aínda estaban en vigor naquel momento, esta 25 edición volve ofrecer un evento para gozar con todos os sentidos.
O programa preparado para esta celebración das vodas de prata desta festa gastronómica volverá ofrecer ao visitante a posibilidade de participar na comida popular, asistir a concertos, degustar os pratos elaborados con este pemento como ingrediente principal, ou gozar da oferta do resto de postos que tamén regresan ao recinto feiral, segundo avanzou a alcaldesa. Ana Villarino presentou o programa oficial da festa xunto ao presidente da Deputación, entidade que colabora co Concello na organización. José Manuel Baltar aproveitou para destacar a cita que enxalza un dos produtos estrela da provincia. «É importante reivindicar e impulsar o noso rural a través do sector primario, un motor fundamental de Ourense», reivindicou.
«A Feira do Pemento de Oímbra enxalza un dos produtos estrela desta provincia, que conta cunha posición importante no mercado apoiado na súa calidade, o bo traballo colectivo e a vantaxe de contar coa Indicación Xeográfica Protexida», insistiu o presidente da Deputación ourensá durante a presentación do programa.
A carballeira situada nas inmediacións da casa consistorial acollerá o evento que arrincará ás once da mañá coa apertura dos postos de venda de produtos locais, artesanía e a exposición gastronómica con pratos elaborados polos veciños e baseados no pemento. «Publicarase un receitario con todos os participantes», anunciou a rexedora que fixo fincapé na necesidade de seguir potenciando e divulgando este produto da terra. A comida popular está prevista para as dúas da tarde e serviranse, ademais de pementos, polbo, empanada, carne ó caldeiro, doces e viño da Denominación de Orixe Monterrei. O menú custa 15 euros e pódese adquirir nos bares da localidade, na propia casa consistorial de Oímbra ou nos establecementos de Verín. Aqueles que non queiran ou poidan asistir á comida popular, deben saber que durante todo o día se ofrecerán degustacións gratuítas de pementos e tamén seguirán traballando as pulpeiras.
Pero non todo será comer. A banda de Bousés encargarase da ambientación musical durante toda a xornada, haberá actividades infantís e unha concentración de coches antigos. Aínda que o prato forte chegará ás oito da tarde. É a hora prevista para que arranque o concerto de Milladoiro que ofrecerá o mellor do seu repertorio a todos os que acudan a celebrar estas vodas de prata da Festa do Pemento de Oímbra