Dous dos tres incendios de Oímbra están apagados e segue activo o de Vilariño de Conso
OÍMBRA
O lume que afecta o parque natural do Invernadeiro queimou 6.500 hectáreas
25 jul 2022 . Actualizado ás 20:55 h.Despois dunha semana de intenso traballo por parte dos equipos de extinción, dúas dos tres incendios forestais que afectaban o municipio ourensán de Oímbra está xa extinguido. A Consellería de Medio Rural informou de que xa se deron por finalizadas os labores de extinción nos focos de Videferre e SanCibrao . Segundo as últimas estimacións estes incendios, que entraron desde Portugal empurrados polos fortes ventos, calcinaron en total 1.400 hectáreas. Aínda non está apagado, pero a Xunta considérao controlado, o foco de Rabal (2.100 hectáreas), onde xa non existe perigo para as poboacións e os traballos céntranse en manter húmidas as zonas calcinadas e evitar que haxa rebrotes.
O incendio que se iniciou en Riodolas, en Carballeda de Valdeorras, na noite do 14 de xullo e que arrasou 10.500 hectáreas, obrigando a desaloxar aldeas enteiras e calcinando decenas de vivendas, quedaba por fin estabilizado este domingo. Propagouse ao Barco, a Rubiá e tamén a León. Segue preocupando, no entanto, a situación en Vilariño de Conso. Durante a xornada do sábado e domingo os efectivos de extinción, dos que forman parte unidades da BRIF de Laza, realizaron contrafuegos para frear o avance das chamas que persisten no parque natural do Invernadeiro. Este incendio consumiu xa 6.500 hectáreas e nel traballan 134 brigadas, apoiadas desde o aire por nove avións e quince helicóptero. Aínda que non hai estimacións oficiais, crese que as chamas afectaron á metade do parque natural, considerado un dos refuxios de biodiversidade máis importantes de Galicia.
«Empezamos a estar un pouco tranquilos, se ben aínda non podemos confiarnos do todo», explicou este domingo Elías Rodríguez, alcalde de Rubiá . Nas últimas horas os veciños afectados polos desaloxos regresaron ás súas casas pero na zona segue un amplo despregamento de medios para controlar os perímetros e as últimas zonas nas que houbo lume, como Quereño. «Foi algo terrible» admite o rexedor, que advirte que nunca vira un lume tan virulento como o que afectou ao municipio estes días. «Aquí estamos acostumados aos incendios, por desgraza, pero como este, que afectou tanto ás casas, non viramos ningún», sinala.
No municipio tamén se reacolleu a quen perderon os seus fogares, que se están recolocando nos doutros veciños ou en segundas residencias. «Todo o mundo se está envorcando con eles», asegura o alcalde.