Nunha librería do Carballiño envolven os agasallos de Nadal con moito mimo e páxinas de La Voz

Existen moitas formas de ser orixinal á hora de regalar. Non son poucos os que en Nadal tratan de agudizar o enxeño cos obsequios e é que hai veces nas que é difícil acertar. «Penso que regalar libros é dalgunha maneira regalar experiencias», di Manuel Iglesias Nanín. É o propietario da librería Escolma, situada na rúa Tomás María Mosquera do Carballiño . Desde hai 18 anos dedica o seu día a día a vender e recomendar libros, a tratar de transmitir o seu amor pola lectura. Manuel non só le prosa, tamén é un gran afeccionado á prensa escrita e este Nadal quixo que o seu costume estivese presente en Escolma. Na librería carballiñesa levan todo o mes envolvendo os libros para agasallo en follas de La Voz de Galicia. «Eu son de papel. Esperto e o primeiro que fago é baixar a mercar a prensa para poder lela tranquilamente co meu café. Comezo cada día co xornal», afirma. Despois de lelos, vai xuntando os xornais para tiralos no colector de papel. «Pero este ano xurdiume a idea de dárlle outra vida a esas follas», conta. Empezou a envolver os libros nelas, adornando os paquetes resultantes con lazos e adhesivos, e a súa orixinal idea sorprendeu aos clientes. «Empezou a vir xente a dicir que quedaba moi bonito. Mesmo fai uns días veu un home comprar doce libros e pediu todos envoltos en xornal», di. «A min alégrame porque o que máis me gusta é empezar o día lendo os medios. É un hábito que se está a perder e penso que desta maneira igual podemos motivar á xente a retomalo», engade.

Os agasallos envoltos en follas de La Voz xurdiron por Nadal pero parece que van quedar como aceno de identidade, en Escolma. «Tendo en conta o que lle gustaron á xente imos mantelos. En vez de adornar os paquetes con lazos, cambiaremos a outro tipo de cintas e etiquetas, máis cotiás», remata Manuel, que, por certo, fai as súas propias, con mensaxes en galego relacionados con cada tempada.

---

---

---