O Carballiño, Piñor, Cea e Maside reclamarán unha ligazón directa coa autovía a Lugo
O CARBALLIÑO
Francisco Fumega explicou que hoxe haberá unha reunión dos alcaldes co subdelegado do Gobierno e técnicos de Fomento
17 feb 2022 . Actualizado á 05:00 h.Os concellos de San Cristovo de Cea, Piñor, Maside e O Carballiño reclamarán a Fomento que a autovía A-56 entre Ourense e Lugo conte cun ramal de ligazón á comarca. Farano de forma conxunta, segundo sinalou o alcalde carballiñés, Francisco Fumega. O rexedor explicou que este mesmo xoves reuniranse os catro alcaldes co subdelegado do Gobierno e con representantes de Fomento para abordar esta cuestión. Respondeu así a unha moción de Espazo en Común que pedía que o Concello do Carballiño liderase unha proposta beneficiosa para toda a comarca. Segundo o alcalde, sería unha obra duns 13 quilómetros, aínda que non definiu cal podería ser o punto de ligazón. Si explicou que se trata dunha demanda de doado solución xa que non sería necesario proxectar nin túneles nin viadutos, o que reduciría os custos. «Non sería unha idea desatinada e para a comarca é un elemento esencial que serviría para estruturar a nosa conexión con Lugo», dixo Fumega. Todos os grupos apoiaron a moción de Espazo en Común, subliñando que sería vital para o futuro económico da comarca.
Durante a sesión plenaria, Espazo en Común deu conta da situación na que se atopan as depuradoras de Carrás e de Godás do Río. En concreto, pediu que se acometa con urxencia o procedemento necesario para a súa regularización e posta ao día, xa que está sen legalizar a autorización de verteduras ao río. Esta situación carreta continuas multas por parte da Hidrográfica ao Concello. O alcalde explicou que levan desde mediados do 2019 agardado resposta por parte do organismo de conca que en diversas ocasións requiriu documentación para solucionar o problema. Por ese motivo, informou o alcalde, recorreranse todas as sancións.
A pedimento do Partido Popular, o Concello traballará na confección dun plan de accesibilidade para eliminar as barreiras arquitectónicas das rúas. Contará cunha partida específica no presuposto. O BNG, pola súa banda, conseguiu o apoio de todos os grupos na súa proposta de celebrar o 23 de febreiro o Día de Rosalía, con diferentes actos na vila.
Durante a sesión plenaria deuse conta da posta ao día do imposto de plusvalía, obrigada por lei en todos os concellos. Neste sentido, o alcalde do Carballiño explicou que se habilitará un mecanismo para que todos os veciños poidan, a través dun simulador, coñecer cal é a mellor opción de pago.