A Deputación publica a listaxe dos donos afectados, que poden alegar
04 oct 2023 . Actualizado ás 05:00 h.A creación dunha senda peonil que unha a área recreativa do Salgueiral co Campiño de Viloira remontando o río Sil ao seu paso polo Barco de Valdeorras está máis preto de ser unha realidade. Esta semana o proxecto deu un paso importante coa publicación da listaxe dos terreos que serán expropiados para poder facer a obra. En total veranse afectadas 45 leiras, todas de propiedade privada salvo tres: unha é do Concello, outra da Confederación Hidrográfica Miño-Sil e outra da comunidade de montes do Coutado. Na maioría dos casos trátase de terreos non urbanizables, aínda que tamén os hai que si o son.
Ábrese agora un período de 15 días para que os afectados poidan presentar alegacións ao proxecto de expropiación. A documentación do proxecto está na sección de patrimonio e expropiacións da Deputación.
A administración provincial encargarase da expropiación dos terreos en virtude dun convenio co Concello do Barco. O documento será ratificado no pleno de mañá.
O proxecto de crear unha senda na marxe esquerda do río Sil leva anos xestándose. O obxectivo é facer practicable a ribeira para poder enlazar desde o centro urbano ata o campo de fútbol de Viloira. Trátase dunha obra cun orzamento estimado de 550.000 euros para o que o Concello barquense conta coa colaboración da Confederación Hidrográfica do Miño-Sil, que asumirá o 80 % do custo total. Nesa cifra non aparece recollido o custo da expropiación dos terreos.