Peludines Rueiros de Valdeorras vende tapabocas e calendarios para recadar fondos para a protectora
28 oct 2020 . Actualizado ás 05:00 h.É obrigatorio o uso de máscara e ter un calendario a man sempre é útil, aínda que sexa para marcar en verde esperanza o 9 de maio no que —agora— sitúan o fin da vida con restricións polo coronavirus. Dous obxectos útiles que ademais poden ser solidarios, como son os que lanzou ao mercado Peludines Rueiros de Valdeorras. A protectora situada en Rubiá busca así fondos para manter aos 15 cans que agora teñen baixo o seu amparo (aínda que hai un afortunado que se irá ao seu novo fogar en breve). «Moitos se recollen na rúa, e teñen enfermidades que hai que tratar no veterinario; e tamén hai que comprar a comida», explica Pilar Pérez Bustillo, que desde fai tres anos colabora activamente coa protectora. De feito, no seu negocio (Anpema, na rúa Real do Barco) están á venda os calendarios e as máscaras; que tamén se poden adquirir na clínica veterinaria Valcan, no Malecón. O prezo é de 10 euros por cada obxecto, aínda que hai unha oferta especial de 17 euros para os que leven o lote. Ah, e quen queira botar unha man limpando o recinto dos cans, en Peludines será benvido.