O biker local fixo un alto no seu calendario mundialista
27 jun 2022 . Actualizado ás 05:00 h.A experiencia de Pablo Rodríguez Guede nos circuítos da Copa do Mundo hano convertido nun habitual das seleccións españolas en distintos eventos internacionais, nos que atopou un oco para participar no BTT de Maceda , en casa. A súa décimo terceira edición definía este ano, ademais de Cópaa Deputación, o Campionato Galego da especialidade olímpica (XCO).
Nese escenario ben coñecido, o biker do BH O Templo impuxo o seu ritmo internacional, para alzarse co cordón de campión galego por diante de Saúl López (Academia Postal Abanca Maceda), o sólido líder da Copa autonómica ao longo da tempada. O podio completábao Manuel Ángel Parada (Xesteiras).
En categoría absoluta feminina, o título foi para Lara Lois (Moto Bike), mentres que o club anfitrión sumou outros dous podios coa vitoria de Andrea García (sub 23) e a prata júnior de Sarela Conde.
Do botín ourensán tamén cabe destacar os triunfos do cadete Álex García (CC Carballiño) e do Máster 30 José Carlos Sanmiguel (Ourense Termal).
Toda nunha xornada que volveu destacar a importancia de Maceda no panorama ciclista nacional e mesmo a nivel continental, como se demostrou coa presenza da selección romanesa que prepara a súa participación no próximo europeo, cunha concentración en terras ourensás, o que provocou que se duplicasen podios nalgunhas categorías, xa que os seus deportistas non podían optar aos cordóns galegos.