Identificado Baldomero Vigil-Escaleira, outro dos 7 asturianos fusilados no cemiterio de San Breixo de Celanova

O resultado das análises realizadas polo Laboratorio de Xenética Forense da USC permitiu confirmar a identidade doutro dos sete asturianos fusilados en 1939 no muro oeste do cemiterio de San Breixo en Celanova (Ourense). Trátase do máis novo dos homes asasinados, Baldomero Vigil-Escaleira Vallejo, de 19 anos de idade.

Así o confirmou o Comité de Memoria Histórica da Comarca de Celanova, que subliñou que esta identificación foi posible grazas á mostra de ADN achegada por Pilar Vigil-Escaleira, sobriña do represaliado. Esta familiar accedeu o pasado mes de novembro a entregar esa mostra no centro forense do IMELGA en Verín, dirixido polo antropólogo Fernando Serrulla (un dos investigadores principais do equipo galego de exhumacións que coordina o Grupo Histagra da USC).

Baldomero Vigil-Escaleira Vallejo, natural de Xixón, pintor e membro da CNT, atopábase no hospital cando a cidade caeu ante os «nacionais» en outubro de 1937 e tratou de fuxir a bordo do buque Gaivota, que foi apresado días despois. Tras ser desembarcado en Ribadeo foi trasladado ao campo de concentración de Camposancos, na Guarda (Pontevedra), onde foi sometido a un Consello de Guerra e condenado á morte. En xaneiro de 1939 ingresou na prisión de Celanova xunto aos outros fusilados que foron inhumados nesa mesma fosa, identificada como a número 6, segundo o rexistro de Camilo González, que era o encargado do cemiterio.

Ese rexistro foi recuperado polo Comité de Memoria Histórica no Arquivo Intermedio Militar Noroeste de Ferrol en abril de 2021, grazas ás investigacións do historiador Pablo Sánchez. Posteriormente, tras darse a coñecer publicamente o achado da fosa, os familiares de dúas vítimas contactaron co Comité, do mesmo xeito que o grupo Histagra da USC e púxose en marcha o proceso para a exhumación e a confirmación das identidades destes represaliados asturianos.

As mostras de ADN permitiron corroborar que dous dos corpos pertencían a Abelardo Suárez e Marcelino Fernández. Os seus familiares recibiron os seus corpos en xuño de 2023 nunha cerimonia celebrada no Concello de Celanova. No outono pasado, grazas á investigación da xornalista da Radio Televisión Pública de Asturias, Patricia Martínez, e ao labor divulgador de Fernando Serrullo, foi localizada Pilar Vigil-Escaleira, e varios meses despois, o seu ADN permitiu confirmar a identidade doutro dos corpos da fosa de San Breixo., informa Europa Press.

---

---

---