A Garda Civil, que detivo a dous homes, fala de desavinzas familiares
29 dic 2023 . Actualizado ás 13:11 h.O equipo da Policía Xudicial da Garda Civil de Xinzo de Limia detivo este xoves a dous homes que o pasado Nadal entraron nunha vivenda do concello ourensán de Celanova portando varias armas brancas. Os homes, un veciño de Paderne de Allariz, de 34 anos, e outro de 39, natural de Celanova, levaban postos pasamontañas e esgrimían varias machadas cando entraron por sorpresa na casa dun familiar na pequena aldea de Amedo, que non ten máis dunha decena de veciños.
Os feitos sucederon na tarde noite e os berros dos moradores da casa escoitáronse polas rúas da aldea alertando a un par de veciños que nese momento paseaban por Amedo e que chegaron a ver aos dous home entrar na vivenda.
A pesar das armas que portaban, os dous homes non causaron danos aos moradores. A Garda Civil apunta a que detrás dos feitos podería haber desavinzas familiares.