A saída de vía dun furgón provoca un conato de incendio forestal na autovía de Celanova

Os bombeiros da Terra de Celanova e a Garda Civil interviñeron este sábado por mor dun accidente de tráfico que desembocou nun conato de incendio forestal. Segundo informou o instituto armado, produciuse unha saída de vía dun furgón á altura do quilómetro 18 da AG-31, ao final da autovía de Celanova. 

O accidente do vehículo provocou un pequeno incendio na rotonda de Casal de Bispo, no municipio de Verea , onde se atopa a saída sur da autovía. Os bombeiros do parque comarcal sufocaron as chamas antes de que chegasen a propagarse.

---

---

---