Un home de 80 anos que conducía sen cinto de seguridade morre tras un choque en Carballeda de Avia
CARBALLEDA DE AVIA
Os ocupantes do coche co que chocou o do falecido, un Citroën C4, resultaron ilesos
29 feb 2024 . Actualizado ás 19:12 h.Un home de 80 anos, natural do concello ourensán de Carballeda de Avia, faleceu esta mañá tras un accidente de tráfico . Os feitos ocorreron ao redor das 10.30 horas no quilómetro 3 da OU-0306, entre as localidades de San Cristobo e Leiro. O sinistro consistiu en unha colisión frontal dun Renault 19 contra un Citroën C4, no que viaxaban dúas persoas, que resultaron ilesas tras o golpe. O condutor do primeiro vehículo, que era o único ocupante do mesmo, non levaba posto o cinto de seguridade e morreu no lugar do accidente.
Adolfo, natural da vila de Abelenda dás Penas, estaba casado e tiña un fillo. Todo apunta a que o home, que saíu da súa casa a facer recados, puido despistarse ou sentir unha indisposición, xa que no lugar do accidente atópase un pequeno desvío cara ao lugar de Fiscás, que non está habitado. O vehículo do falecido desviouse cara a esa zona no momento no que pola estrada, tras unha curva, apareceu o Citroën cuxo condutor non puido evitar o impacto. «Era unha persona moi prudente que sempre ía moi despacio», sinalaba un veciño horas despois do sinistro.
A Unidade de investigación da Garda Civil de Ourense instrúe dilixencias para determinar as causas do sinistro. Ata o lugar desprazáronse Urxencias Sanitarias de Galicia-061, o GES de Ribadavia, a Garda Civil de Tráfico e voluntarios de Protección Civil de Carballeda de Avia.