A ruta de belenes carnavalescos dunha aldea de Boborás que non deixa indiferente a ninguén
BOBORÁS
Figueiroa, na parroquia de Cameixa, transfórmase cun decorado do Nadal singular
04 ene 2024 . Actualizado ás 05:00 h.Figueiroa, na parroquia de Cameixa, en Boborás transformouse nun pobo do Nadal auténtico e orixinal, grazas ao traballo e imaxinación de varios veciños. Teñen unha ruta de belenes que non deixa a ninguén indiferente e que está a recibir multitude de visitas. José Luis, O Rubio de Cameixa, dedicou nove semanas completas, da mañá á noite, a montar todos os seus singulares belenes, nos que os personaxes do Nadal —en particular Papá Noel, pero tamén os Reis Magos e o portal— teñen un aire moi carnavalesco. Rubio non o oculta: «Son moi entroideiro».
Gorecidos baixo construcións vexetais, feitas con troncos de madeira e medeiros (feixes de palla), que empezou a facer tres anos, aparecen papás Noel en distintas escenas, durmindo, agardando o autobús, sobre un trineo ou sobre un carro de vacas. «Ese acabeino en Noiteboa. Deiteime ás catro da mañá o 24 e levanteime o 25 ás nove, que había unha xeada moi forte e aínda o decorei. Levamos tres anos e a xente quere cousas novas», conta Rubio , contento porque os belenes son unha atracción que está levando moita xente á aldea. Un das pasaxes máis espectaculares é o túnel da sorte, onde uns manequíns vestidos de Reyes Magos dan a benvida a un portal que comparten a virxe, o Neno, san José e Papa Noel á calor da cheminea, mentres unha mesa con licor café ou amarelo, caseiros, ofrécense ao visitante para que se sirva.
Jaime Mella e Loli Moreira, unha parella que vive ao fondo do pobo, foron os primeiros que empezaron coas decoracións creativas en Nadal, fai uns doce anos. Na pandemia sumóuselles Rubio e, coa axuda doutros amigos, como Mario e Sinda e Iván, de Brués, ademais de Manuel, converteron Figueiroa nun lugar no que o Nadal se ve en cada esquina: nun lavadoiro, nos peches das leiras e nas casiñas dos elfos. «Gústanos facer piña», salienta Jaime. O patio da súa casa ábrese aos visitantes e Loli regala un detalle aos nenos. Hai un portal de belén a tamaño humano, no que as visitas se poden sentar ao lado de María, e animais moldeados con espuma de poliuretano con cabezas articuladas cun sistema de péndulo.
Este ano creceu a familia porcina, con pequenos cerditos, e sobresaen os bonitos belenes feitos a man, con de coscos o follatos millo, presentados dentro dun barril de viño, enmarcado por un gran arco feito con outro tonel. O xardín está cheo de virguerías, como unha bandexa de peixes de madeira, e personaxes tradicionais. Un dos belenes, con figuras convencionais, téñeno sobre un carro de vacas e chama a atención a natureza viva que forma outro portal cun grupo de pollitos e un coello reais.
«Jaime ataca de alá, eu ataco de aquí e traemos moita xente. A paga extra vaise en luceciñas, non son as do Caballero, pero donativos non queremos», afirma O Rubio. Un empresario de Boborás ofreceulle unhas marquesiñas de autobús que retirara na Limia e converteunas en sete palmeiras que balizan a pista de Figueiroa, repleta xa de decoración. A súa casa, e algunha outra, tanto as modernas como as rústicas, destacan pola súa iluminación no medio do deserto demográfico nocturno con esta vila de Nadal rural, artesá, detallista e excesiva, que se pode visitar ata case finais de xaneiro.