A viaxe política de Villarino: Amoeiro, Ourense, a Deputación, San Cibrao e, agora, Madrid

Os últimos catro anos foron frenéticos para o líder provincial do PSOE. No 2019 encamiñábase cara a un cuarto mandato como alcalde de Amoeiro cando un cambio de última hora situouno como candidato na capital ourensá. Foi voceira socialista na cidade durante case todo o mandato —compatibilizando esa responsabilidade coa que tamén tiña na Deputación— e pretendía seguir neses cargos tras as eleccións municipais do pasado maio. Con todo, os plans do partido para el eran moi diferentes.

Villarino presentouse ás primarias para ser de novo candidato na capital, pero o PSdeG suspendeunas para impoñer a Paco Rodríguez. Entón, para garantir polo menos a súa continuidade na Deputación, o líder dos socialistas ourensáns presentouse por San Cibrao das Viñas a pesar de carecer de vínculos familiares ou persoais con ese municipio. Pero, finalmente, tampouco terá oco na institución provincial. O PSdeG —que desautorizou a estratexia que Villarino pretendía impulsar para negociar con Gonzalo Pérez Jácome a substitución de José Manuel Baltar— ofreceulle a saída do Senado, que xa estaba sobre a mesa desde a suspensión das primarias da cidade. Aceptou e, agora, despois de Amoeiro, Ourense e San Cibrao, o socialista terá o seu novo destino político en Madrid.

Noela Blanco, relegada

A proposta de Villarino para encabezar a lista da Cámara Alta recibiu o visto e prace do comité provincial do partido e agora deberá pasar polo filtro autonómico e federal, aínda que a operación xa contaría co visto e prace de todos os estamentos. Segundo a proposta aprobada onte, a candidatura ao Senado completaríana María Alida Iglesias e Luis Gulín. A do Congreso lideraríaa Marga Martín acompañada de Adolfo Pérez, Uxía Tizón e Borja López. Noela Blanco sería suplente a pesar de ser unha das máis votadas pola militancia.

---

---

---