Kuki Prada amplía servizos coa incorporación de Lau Beauty
10 jul 2025 . Actualizado á 18:58 h.Cunha década de experiencia no sector, hai seis anos Kuki Prada abriu un centro de dietética e nutrición na rúa do Progreso na Rúa de Valdeorras. Asesora aos seus clientes na consulta e complementa os servizos con aparatología como cavitación, presoterapia e vacunterapia, «dependendo do que precise cada persoa», sinala.
Relata que na primavera e verán sobe moito a demanda, aínda que ten clientes fieis todo o ano. Nestes meses a maioría de quen acode ao seu centro son mulleres que queren baixar de peso antes de ir á praia ou á piscina.
Desde este mes, o centro amplía a súa carta de servizos para dar resposta á demanda da clientela. «A xente pedía facerse as uñas ou tratamentos faciais, pero eu diso non levo», sinala Prada. De aí a incorporación de Laura Rodríguez, que se promociona como Lau Beauty. «Fago manicuras e pedicuras, depilación facial e corporal, lifting de pestanas, tratamentos de parafina, maquillaxes e tamén masaxes: relaxante, drenante e maderoterapia», sinala. Realiza ademais tratamentos faciais.
Di que o que máis pide a clientela é todo o relacionado con prepararse para o verán, desde arranxarse as mans e os pés a unha limpeza facial, sen esquecer os tratamentos de maderoterapia. No que respecta ás uñas, a tendencia son o cor coral e os estampados de follas e flores. Conta tamén que o vermello é un clásico que nunca falla. En maquillaxe levan as cores claras e nudes, salvo no caso dunha voda de tarde, que entón triunfan os brillos.