O estudo propón mellorar a vía ata conseguir uns parámetros de trazado homoxéneos
17 feb 2024 . Actualizado ás 05:00 h.A Xunta encargou a redacción do proxecto de acondicionamento da estrada OU-533 entre A Gudiña e Viana do Bolo. O tramo que se adecuará é de 15 quilómetros e servirá para mellorar unha vía autonómica na que resulta difícil realizar adiantamentos. Para iso, executarase un novo trazado sobre a base da estrada actual no tramo entre ambos os concellos, o que permitirá dotala de carrís adicionais de adiantamento coa rectificación de 31 curvas. Estímase que as obras teñan un custo de 15 millóns de euros.
O estudo propón mellorar a estrada ata conseguir uns parámetros de trazado homoxéneos, mellorando os actuais, e permitir unha condución cómoda, segura e adecuada á velocidade establecida de 90 quilómetros por hora. A OU-533 ten 50,1 quilómetros e une a N-525 na Gudiña coa N-120 na Rúa.