Un home de 72 anos, veciño da Arnoia, falece tras chocar o seu coche contra un camión en Ribadavia
A Arnoia
O accidente de tráfico tivo lugar na OU-504, en San Cristovo de Regodeigón; o condutor quedou atrapado e os servizos de urxencias non puideron facer nada por salvarlle a vida
10 oct 2023 . Actualizado ás 12:46 h.Un veciño de 72 anos do concello ourensán da Arnoia faleceu esta mañá tras chocar o turismo que conducía contra un camión en San Cristovo de Regodeigón (Ribadavia). Os feitos ocorreron ao redor das dez da mañá na estrada OU-504. Por circunstancias que se descoñecen, o home invadiu o carril contrario no momento no que pola estrada circulaba un camión, cuxo condutor non tivo tempo para reaccionar.
O falecido, un home xa xubilado, desprazouse da Arnoia a Ribadavia e minutos antes do sinistro parouse nunha gasolineira da localidade para encher de combustible o depósito do seu coche. Tras o choque, quedou atrapado dentro do vehículo. De o accidente de tráfico alertouse ao 112 Galicia, que desprazou ata o lugar a membros do GES do Carballiño, do servizo de bombeiros do Carballiño- Ribeiro, ademais da a Garda Civil de Tráfico, a Policía Local de Ribadavia e Protección Civil da vila. Tamén se alertou ao servizo de Urxencias Sanitarias, que mobilizou un helicóptero medicalizado. A pesar de que se iniciaron as manobras de reanimación, nada se puido facer por salvar a súa vida. Todo parece indicar que faleceu no acto.
O condutor do camión, de 53 anos, foi atendido no lugar, pero resultou ferido leve e non foi necesario o seu traslado a un centro sanitario.