O equipo ourensán conseguiu o seu primeiro punto no Couto pese ao empurre final do Athletic B
01 sep 2025 . Actualizado á 00:51 h.Un bo punto para empezar. O Ourense CF sobreviviu ao empurre do Bilbao Athletic nos minutos finais do encontro no Couto e puido salvar o empate (0-0) e sumar o seu primeiro punto na liga. Dani Llácer presentou unha aliñación cos que levaban «máis tempo» no equipo, pero na segunda parte entraron xogadores que apenas levan unhas sesións de adestramento. Na segunda parte custou, pero o conxunto azul deu unha boa cara ante un filial de calidade e máis feito que este Ourense CF.
O Ourense Club atopouse co contratempo inicial do central Adri Pérez nun lance do xogo case nada máis empezar e tívolle que substituír Miguel Prado, un central destro, aos sete minutos.
O partido estivo igualado na primeira metade e os dous equipos parecía que se prepararon para un duelo longo, no que a choiva fixo acto de presenza nos primeiros minutos. Co paso do tempo, o campo volveríase pesado e iso sufrírono máis locais, que no mes de agosto non puideron tocar a superficie natural do Couto.
Jerin intentou o primeiro disparo a porta, tras un centro de Marco Camus, pero foise polo lateral da portería. O Bilbao Athletic protagonizaba as primeiras aproximacións, sobre todo pola banda dereita coas incursións de Endika. A defensa azul estivo ben para cortar e atento Álvaro Yuste ás axudas de Hugo Sanz.
A balón parado, o filial bilbaíno tamén puido facer dano, cun lanzamento de falta de Ibon que rematou Asier, pero a defensa ourensanista resolveu ben. Tamén estivo acertado Álvaro Ratón, primeiro ante un disparo de Aimar e logo estirándose para despexar o de Asier tras unha xogada pola banda dereita.
O Athletic B defendíase tamén con seguridade, pero o Ourense CF ensinou as garras no final da primeira parte. Omar, desde a banda esquerda, serviu un bo balón a Amín, que non puido finalizar ante a defensa branquivermella. Ao fío do descanso, Yuste remataba ben de cabeza un córner, pero o balón botaba na área e caía en mans de Mikel. Jerin, cun disparo afastado, case sorprende ao meta vasco, que capturou en dous tempos.
Cambios tras o descanso
Dani Llácer optou por cambios ofensivos para a segunda parte, aínda que iso non se traduciu en ocasións claras. Coa entrada de Adri Guerrero, Marco Camus pasou á media punta e Kensly Vázquez refrescou a punta de ataque. O partido entrou nunha fase de control, sen perigo nin finalizacións contundentes, apenas algún remate frouxo. Viuse algunha boa conexión, ou intento, entre Jerin e Kensly e un disparo longo de Hugo Sanz que detivo sen problemas Mikel.
O Bilbao Athletic desafinaba nos pases últimos e parecía que o partido camiñaba ao empate sen goles. A garra dos cachorros dos leóns apareceu no tramo final da contenda. Ibon Sánchez causou moitos problemas coa súa mobilidade e beneficiouse dos servizos que recibía dos extremos branquivermellos.
Acoso branquivermello
Álvaro Ratón tívose que empregar a fondo para deixar por primeira vez a súa portería intacta. Primeiro un disparo de Ibon coouse entre a defensa, despois outro remate do capitán visitante, tras un saque de esquina, obrigou ao meta azul a voar e a sacar unha boa man. O acoso desde a esquina dereita continuou nos últimos minutos. Iker Monreal tivo a última para os bilbaínos, rematou e o balón quedou botando sen traspasar a liña de gol, ante o alivio algo asombrado de Álvaro Ratón.
O Ourense CF sobreviviu ao acoso final do Bilbao Athletic e puido deixar a súa portería a cero e sumar un bo empate para empezar a liga na que xa está a aprender a sufrir.
OURENSE CF SAD (0): Á. Rato; Enol Coto, A. Yuste, Adri Pérez (M. Prado, min 7), Hugo Sanz; Jerin (Iker Punzano, min 75), Nacho Castillo (David Muñoz, min 57), Dani Garcia (Adri Guerrero, min 46); Marco Camus, Omar e Amín (Kensly Vázquez, min 57).
BILBAO ATHLETIC (0): Mikel; Xabier, Aimar, Iker Monreal, Iker (Eneko, min 46); Eder, Eñaut, Ibon Sánchez; Endika (Peio, min 78), Adrián e Asier (Ibai, min 62).
ÁRBITRO: Guillermo Cueto. Amoestou no equipo local a Miguel Prado, Marco Camus, David Muñoz, Enol Coto e no cadro visitante a Aimar.
INCIDENCIAS: Campo do Couto, tarde chuviosa o que condicionou o estado do céspede natural, que estaba esvaradío. Primeira xornada de Primeira RFEF.-